Azərbaycan Prezidenti İlham Əliyevin ötən gün Albaniyanın paytaxtı Tirana şəhərində keçirilən “Avropa Siyasi Birliyi” 6-cı Zirvə toplantısının açılış mərasimində iştirakı böyük maraqla izlənildi. Dövlət başçısı mərasim çərçivəsində Avropa liderləri ilə bir araya gəldi, bəziləri ilə ayaqüstü söhbət və müzakirə apardı.

Diqqətçəkən məqamlardan biri isə Azərbaycan Prezidentinin Ermənistanın Baş naziri Nikol Paşinyanla görüşü oldu. Liderlər əvvəlcə ayaqütsü söhbət apardı, daha sonra isə müzakirəyə Paşinyanın dəvəti ilə kofe içərkən davam etdilər. İlham Əliyev həmçinin Türkiyə Prezidenti Rəcəb Tayyib Ərdoğanla da görüş keçirdi. Dövlət başçısının Fransa Prezidenti Emmanuel Makronla səmimi görüntüləri də toplantının ən çox diqqət cəlb edən anlarından oldu.

Globalinfo.az-a danışan siyasi analitik Aqşin Kərimov deyib ki, Prezident İlham Əliyev Avropa Siyasi Birliyinin 6-cı sammitində Azərbaycanın güclənmiş mövqeyini nümayiş etdirdi:

“Tiranada keçirilən sammit strateji baxımdan Cənubi Qafqaz regionundan kənarda baş verən proseslərdə Azərbaycanın mövqeyinin mühüm şəkildə formalaşdığını göstərir. İlham Əliyev Ermənistanın Baş naziri Nikol Paşinyanla görüş zamanı liderlik mövqeyini açıq şəkildə ortaya qoydu. Paşinyanın davranışları sanki Azərbaycan Prezidentinə hesabat verirmiş kimi təəssürat yaradırdı. Dövlət başçısının baxışlarında və ritorikasında isə Azərbaycanın Ermənistan üzərində diktə edən siyasi çəkisi açıq görünürdü.

Sammitdə diqqətçəkən məqamlardan biri də Fransa Prezidenti Emmanuel Makronun İlham Əliyevə yaxınlaşaraq onunla söhbət etməsi idi. Bu jesti təkcə diplomatik etiketin tələbi kimi qiymətləndirmək məsələnin yalnız texniki tərəfini əhatə edir. Əslində isə bu, Fransanın Azərbaycanla geosiyasi yaxınlıq nümayiş etdirməkdə maraqlı olduğuna dair siqnal kimi də dəyərləndirilə bilər. Fransanın Bakı ilə dil tapmaq arzusu, eyni zamanda, Azərbaycan-Türkiyə strateji müttəfiqliyinin yaratdığı reallığın bir göstəricisidir”.

Analitik əlavə edib ki, sammit çərçivəsində İlham Əliyevlə Türkiyə Prezidenti Rəcəb Tayyib Ərdoğan arasında keçirilən görüş də mühüm əhəmiyyət daşıyırdı:

“Bu görüş zamanı verilən mesajlar birbaşa Ermənistan rəhbərliyinə ünvanlanmışdı. Həmçinin, Fransa üçün də regiondakı yeni geosiyasi reallıqları anlamaq baxımından ciddi siqnallar ehtiva edirdi. Parisin Bakı-Ankara ittifaqına qarşı regionda koalisiya formalaşdırmaq cəhdlərinin uğursuzluğa düçar olması Fransa prezidentini siyasətində korrektəyə vadar edə bilər. Prezident İlham Əliyev Azərbaycanın sülh və təhlükəsizliyin təmin olunmasına yönəlmiş beynəlxalq və regional mexanizmlərin təşəbbüskarı kimi çıxış edir.

Hərçənd Fransa hələ də regionda eskalasiya risklərini və digər həssas məqamları öz xarici siyasətinin prioritetləri arasında saxlayır. Bu isə yaxın dövrdə Parisin Bakıya qarşı kollektiv cəbhələr formalaşdırmaq niyyətindən tam əl çəkmədiyini göstərir. Bununla belə, Prezident İlham Əliyev Fransanın bu iddialarını neytrallaşdırmaq və regional reallıqlara uyğun davranmağa məcbur etmək üçün qətiyyətli addımlar atacaq. Emmanuel Makron isə Azərbaycanın artan geosiyasi çəkisinin və müttəfiqlik platformasının fərqində olaraq özünü fərqli, lakin manipulyativ bir obrazda təqdim etməyə çalışır. Bu, daha çox görüntü və siyasi taktikanın məhsuludur”.