Pentaqon rəhbərinin ictimaiyyətlə əlaqələr üzrə köməkçisi Şon Parnel ABŞ müdafiə naziri Pit Heqsetin Almaniyadan 5000 ABŞ hərbçisinin çıxarılması ilə bağlı əmr imzaladığını açıqlayıb.

Məlumata görə, hərbçilərin çıxarılması prosesi 6-12 ay ərzində başa çatacaq.

Bir müddət əvvəl Almaniyanın xarici işlər naziri Yohan Vadefulun ABŞ qoşunlarının ölkədən çıxarılması məsələsinə təmkinli yanaşdıqlarını açıqlaması fonunda Vaşinqtonun qərarı bir sıra suallar doğurur.

Globalinfo.az-a danışan siyasi şərhçi Elnur Ənvəroğlu bildirib ki, ABŞ Prezidenti Donald Trampın hazırkı siyasəti ilk baxışda NATO-dan uzaqlaşmaq kimi görünsə də, əslində, bu, Avropa ölkələrinə ünvanlanmış sərt siyasi mesajdır:

“Yəni bir növ Avropa ölkələri artıq oyanmalı və təhlükəsizlik məsələlərində daha çox məsuliyyət götürməlidirlər mesajı verilir. ABŞ sonsuza qədər Avropanın təhlükəsizlik yükünü təkbaşına daşımaq niyyətində deyil. Vaşinqton öz maraqlarına birbaşa xidmət etməyən bölgələrdə əvvəlki həcmdə hərbi iştirakını davam etdirmək istəmir. Buna görə də, ordusunu tamamilə çıxarmır, sadəcə mövcud hərbi kontingenti müəyyən qədər azaldır. Almaniya məsələsində də əsas məqam məhz budur.

Donald Trampın siyasətini bir çoxları qlobal müstəvidə yalnız müəyyən tərəflərə xidmət edən yanaşma kimi təqdim etməyə çalışır. Mən isə bununla tam razı deyiləm. Trampın dövründə beynəlxalq informasiya məkanında bir sıra əvvəlki stereotiplər ciddi şəkildə sarsıldı. Vaxtilə dünya mediasında fərqli formada təqdim olunan təhlükə anlayışı bu gün daha mürəkkəb və çoxşaxəli müzakirə olunur. Bu da beynəlxalq münasibətlər sistemində informasiya təsirinin necə dəyişdiyini göstərir”.

Siyasi şərhçi bildirib ki, Avropa İttifaqı ilə bağlı da bənzər vəziyyət var:

“Bəziləri Trampın siyasətinin Avropaya zərbə vurduğunu düşünür. Halbuki müəyyən mənada bu yanaşma Avropanın zəif tərəflərini üzə çıxardı və onları öz təhlükəsizlik strategiyalarını yenidən nəzərdən keçirməyə sövq etdi. Fransa, Almaniya, İtaliya və Polşa kimi əsas ölkələrin gələcəkdə daha müstəqil təhlükəsizlik mexanizmi formalaşdırmaq istəyi də bunun nəticəsidir. Məqsəd Brüsselin qərarvermə imkanlarını gücləndirmək və ABŞ-dan asılılığı azaltmaqdır.

Almaniya bu gün iqtisadi baxımdan Avropanın aparıcı güclərindən biridir. Lakin hərbi potensial baxımından iqtisadi gücü ilə tam uyğun səviyyədə deyil. Mövcud geosiyasi reallıq, xüsusilə Rusiya ilə bağlı təhlükəsizlik narahatlıqları Almaniyanı hərbi imkanlarını artırmağa sövq edə bilər.

ABŞ mümkün qədər NATO daxilində öz hərbi xərclərini optimallaşdırmağa çalışır. Ancaq bunun NATO-dan tam çıxmaq anlamına gəldiyini düşünmürəm. Donald Tramp belə bir istək ortaya qoysa belə, ABŞ Konqresi bu səviyyədə radikal qərarın qəbuluna asanlıqla imkan verməz”.