Beynəlxalq münasibətlər üzrə amerikalı ekspert Hilbert Doktor bildirib ki, Rusiya Baltikyanı ölkələrin öz hava məkanını Ukrayna dronları üçün açmasına dözməyəcək.

Sitat:

“Bütün beynəlxalq standartlara əsasən, belə bir addım Baltikyanı ölkələr üçün son dərəcə ağır nəticələr doğura bilər. Əgər estonlar, latışlar və litvalılar Ukrayna dronlarının öz əraziləri üzərindən uçmasına icazə versələr, bu, birbaşa hərbi eskalasiyaya və genişmiqyaslı müharibənin başlanmasına səbəb olar”.

Globalinfo.az-a danışan siyasi şərhçi Kənan Novruzov deyib ki, Baltikyanı ölkələrin hazırkı mərhələdə belə bir addım atmaq niyyəti görünmür:

“Onlar bu riskin fərqindədirlər və mümkün nəticələri aydın şəkildə anlayırlar. Təbii ki, Litva, Latviya və Estoniya belə bir qərar verərsə, Rusiya buna səssiz qalmaz. Moskvanın bunu öz təhlükəsizliyinə birbaşa təhdid kimi qiymətləndirməsi ehtimalı olduqca yüksəkdir. Əksinə, bir çox ekspertin fikrincə, Rusiya regional münaqişəni daha geniş coğrafiyaya yaymaq üçün uyğun fürsət və ya siyasi əsas axtarır.

Belə bir şəraitdə Baltikyanı ölkələrin atacağı yanlış addım Kremlin əlində ciddi təbliğat və hərbi-siyasi vasitəyə çevrilə bilər. Xüsusilə NATO üzvü olan bu ölkələrin prosesə birbaşa cəlb edilməsi onsuz da gərgin olan təhlükəsizlik mühitini daha da kritik həddə çatdırar.

Düşünürəm ki, Litva, Latviya və Estoniya məhz bu səbəbdən daha ehtiyatlı davranmağa üstünlük verəcək. Çünki onlar anlayırlar ki, Ukraynaya siyasi və humanitar dəstək başqa, birbaşa hərbi logistika üçün hava məkanının açılması isə tamam fərqli və daha təhlükəli mərhələdir. Bu isə artıq təkcə Rusiya-Ukrayna müharibəsi çərçivəsində deyil, bütövlükdə Avropa təhlükəsizlik sistemində yeni qarşıdurma riski yarada bilər”.