“Politico” nəşrinin məlumatına görə, Azərbaycan, İndoneziya və Pakistan Qəzza zolağına sülhməramlı qüvvələr göndərmək üçün əsas namizəd ölkələr hesab olunur.

Bu iddia nə dərəcədə realdır? Daim gərginlik və müharibə zonası olan bir əraziyə qoşun göndərmək hansı riskləri daşıyır?

Globalinfo.az-a danışan hərbi ekspert Səxavət Məmməd deyib ki, bu ölkələrin adının Qəzzaya sülhməramlı göndərilməsi ilə bağlı hallandırılması məntiqə uyğundur:

“Azərbaycan bu günə qədər iki bölgədə – Kosova və Əfqanıstanda sülhməramlı missiyada iştirak edib. Hər iki ərazi kifayət qədər təhlükəli zona hesab olunur. Xüsusilə də Əfqanıstan. Burada müharibə dayansa da, Talibanla ABŞ qüvvələri arasında gərginlik uzun müddət davam edib. Ən mürəkkəb və təhlükəli bölgələrdə Azərbaycan sülhməramlıları Türkiyə ilə birlikdə fəaliyyət göstərib.

Hazırkı mərhələdə Qəzza bölgəsinə göndəriləcək sülhməramlı kontingentin tərkibində azərbaycanlı hərbçilərin də olması ehtimalı var. Azərbaycanın belə missiyalar üçün seçilməsi təsadüfi deyil. Bunun arxasında ciddi siyasi və diplomatik əsaslar dayanır.

Məsələn, Azərbaycan Fələstini dövlət kimi tanıyan ölkələrdən biridir. Ölkəmizdə Fələstinin diplomatik nümayəndəliyi fəaliyyət göstərir. Maraqlı bir detal da var. İsrail-Fələstin toqquşması zamanı Qəzzaya gedən jurnalistlərin sənədlərinə baxıldıqda azərbaycanlı olduqları məlum olanda hər iki tərəf nümayəndəlikdən hörmətlə qarşılanıblar. Azərbaycanın həm İsrail, həm də Fələstinlə münasibətləri sabit və balanslıdır”.

S.Məmmədin fikrincə, Pakistan və İndoneziyanın da bu məsələdə eyni mövqedən çıxış etməsi başadüşüləndir:

“Bu ölkələr Fələstin məsələsində qəti mövqeyə malikdirlər və ehtimal ki, Qərb ölkələrinin, xüsusən də Almaniyanın sülhməramlı qüvvələrini bölgədə görmək istəməzlər. Çünki fələstinlilər buna mənfi reaksiya verə bilər. Azərbaycan isə bu məsələdə böyük təcrübəyə malikdir. Əfqanıstanda ən son çıxan sülhməramlı kontingent Azərbaycan heyəti olub”.

Ekspert qeyd edib ki, istənilən halda bu kimi bölgələrdə fəaliyyət böyük risklər daşıyır:

“Unutmaq olmaz ki, Qəzza və ətraf ərazilərdə müxtəlif dini və radikal silahlı qruplar mövcuddur. Belə şəraitdə təhlükəsizlik təminatı və diplomatik əlaqələr xüsusi önəm daşıyır”.