Pakistan, Azərbaycan və İndoneziyanın vəziyyəti sabitləşdirməyə kömək etmək üçün Qəzza zolağına qoşun göndərəcəyi gözlənilir.

Teleqraf xəbər verir ki, bu barədə “Politico”ya ABŞ müdafiə rəsmisi açıqlama verib.

Nəşrin həmsöhbətinə görə görə, qüvvələrin tərkibi ilə bağlı danışıqlar aparılır, amma hələlik heç bir ölkə qəti öhdəlik götürməyib.

“Politico” həmçinin qeyd edib ki, Qətər, Birləşmiş Ərəb Əmirlikləri və Misir qüvvələri atəşkəsə nəzarət etmək üçün İsrail ərazisindəki ABŞ hərbi bazasında yerləşdiriləcək.

Məsələni şərh edən politoloq Elxan Şahinoğlu bildirib ki, Ağ Ev Azərbaycanın Qəzzada beynəlxalq qüvvələrin tərkibində təmsil olunmasını istəyir:

“Pentaqon həm İsrail, həm də Fələstinlə yaxşı münasibətlərə malik dünyəvi müsəlman ölkəsi olan Azərbaycanın Qəzzaya hərbçilərinin göndərməsinin tərəfdarıdır. ABŞ Prezidenti Donald Trampın Azərbaycan Prezidenti İlham Əliyevi Misirdəki sammitə dəvət etməsi də buna dəlalət edir.

Azərbaycan hərbçilərinin beynəlxalq qüvvələrin tərkibində Kosovo, İraq və Əfqanıstanda fəaliyyət təcrübəsi var. Ancaq Qəzzada vəziyyət daha mürəkkəbdir. Digər tərəfdən, beynəlxalq qüvvələrin Qəzzadakı rolunun nədən ibarət olacağı hələ müəyyənləşməyib. HƏMAS tərksilah olunmasa, bölgədə gərginlik yenə artacaq. Bunu Donald Tramp və İsrail Baş naziri Binyamin Netanyahunun son açıqlamaları da sübut edir. Tramp CNN kanalına müsahibəsində deyib ki, HƏMAS onun sülh planına dair şərtlərə əməl etməsə, İsrail ordusunun Qəzza küçələrinə qayıtmasına icazə verəcək”.

Ekspertin fikrincə, bu açıqlama İsrail rəsmilərinin HƏMAS-ın ünvanına daha sərt açqlamalarına yol açıb:

“İsrail müdafiə naziri İsrael Kats bildirib ki, HƏMAS tərksilah olmaqdan imtina edərsə, İsrail Qəzza zolağında hərbi əməliyyatları bərpa edəcək. Netanyahu isə daha sərt bəyanat verərək bəyan edib ki, ölkəsi HƏMAS-a qarşı mübarizəni hələ başa çatdırmayıb və məqsəd terror təşkilatını tamamilə məhv etməkdir. Yəni Qəzzada atəşkəsə riayət olunsa da, İsrail HƏMAS-ın varlığına seyirçi qalmayacaq.

HƏMAS isə tərksilah olunmağa hazır deyil. Belə bir vəziyyətdə Qəzzadakı beynəlxalq qüvvələr atəşin mərkəzində qala bilərlər. Bu mənada beynəlxalq qüvvələrin Qəzzada fəaliyyətə başlaması HƏMAS qruplaşmasının tərksilahından asılı olacaq”.