Oktyabrın 13-də Bakıda Azərbaycan Baş nazirinin müavini Şahin Mustafayev, Rusiya Baş nazirinin müavini Aleksey Overçuk və İranın Yol və Şəhərsalma naziri Fərzanə Sadiqin həmsədrliyi ilə üçtərəfli görüş keçirilib.

Görüş zamanı üç ölkə arasında Şimal-Cənub nəqliyyat dəhlizi ilə daşımaların həcminin artırılması istiqamətində birgə işlərin görülməsinə dair razılıq əldə olunub. Üç ay ərzində layihə üzrə nəzərdə tutulan tədbirlər planının həyata keçirilməsi üçün işçi qrupunun yaradılmasına qərar verilib. Həmçinin razılaşmaya uğun olaraq dəhliz üzrə infrastruktur layihələrinə birgə baxış keçirilib.

Globalinfo.az-a danışan politoloq Turab Rzayev deyib ki, belə bir görüşün baş tutması gözlənilən idi:

“Hazırda dünyanın hər bölgəsində regional dəhlizlərlə bağlı strateji nöqtələr uğrunda rəqabət gedir. Hətta bu gün qlobal geosiyasi mübarizənin bir hədəfi enerji mənbələridirsə, digər hədəfi dəhlizlərə nəzarətdir.

Rusiyanın tələsdiyi də aydın şəkildə sezilir ki, bu, başadüşüləndir. Kreml Şimal-Cənub nəqliyyat dəhlizində nəzarət imkanlarını genişləndirmək və özünə pay qazanmaq istəyir. Beləliklə, bu dəhliz üzərindən məhsulların tranzitini rahat həyata keçirə biləcək.

Digər tərəfdən, gələcəkdə bu dəhlizdə Hindistan da maraqlı ola bilər. Dehli bir müddət bu dəhlizə dırnaqarası baxırdı, amma son zamanlar mövqeyində dəyişiklik müşahidə edilir. Xüsusilə Hindistan-Pakistan gərginliyi, ABŞ-ın tarifləri artırması Dehlini Moskvaya yaxınlaşdırır.

İran isə xüsusilə silah-sursat satışı və alışında Rusiyadan asılıdır. Ona görə Tehran bu dəhlizin icrasında xüsusilə maraqlıdır.

Azərbaycan üçün isə əməkdaşlıq və dəhlizlərin qovşağında olmaq vacibdir. Bakı üçün bu prosesin çox böyük dividendləri var. İstər iqtisadi, istərsə də siyasi baxımdan gələcək perspektivdə Azərbaycan qazancılı olacaq”.