İsrailin Dohaya hücumu beynəlxalq siyasi arenada rezonans doğurub. İddialara görə, Baş nazir Benyamin Netanyahu ABŞ Prezidenti Donald Trampın da razılığını alaraq HƏMAS-ın Dohadakı qərargahına hücum edib. Lakin Ağ Ev rəhbəri hadisədən sonra Qətər əmirinə zəng edərək hücumu qınayıb.

Hələ may ayında ABŞ Prezidenti bu şəhərə və ümumilikdə bölgəyə səfər edib, iqtisadi əlaqələr qurub. Lakin sözügedən hadisədən sonra bütün Körfəz ölkələrinin Vaşinqtonla razılaşmalara yenidən baxacağı bildirilir.

ABŞ ərəb ölkələrini yenidən itirirmi? Bu, “İbrahim sazişləri” prosesinə necə təsir göstərəcək?

Globalinfo.az-a danışan siyasi şərhçi Əli Zülfüqaroğlu bildirib ki, İsrail hökuməti hazırda çətin durumdadır və bunun köklü səbəbləri var:

“Qəzzada həyata keçirilən uğursuz hərbi əməliyyatlar, HƏMAS-ın məğlub edilməməsi və digər amillər İsraildə hökumətə olan etimadı sarsıdır. Digər tərəfdən, Baş nazir Benyamin Netanyahuya qarşı Beynəlxalq Cinayət Məhkəməsi tərəfindən həbs qərarının verilməsi onun ən yaxın müttəfiq ölkələrə belə səfər edə bilməməsinə gətirib çıxarır. Bu da İsrailin diplomatik fəaliyyət imkanlarını məhdudlaşdırır. Britaniya başda olmaqla, İsrailə ən yaxın olan və hər zaman limitsiz dəstək verən ölkələr artıq İsrailə təzyiq göstərirlər. Xalq da bunun günahını Netanyahu hökumətində görür.

Netanyahunun siyasi ömrünü uzatmağa yönəlik addımları İsrail dövləti üçün ciddi problemlər yaratdı. Nəticədə son 100 ildə mərhələli şəkildə effektiv şəkildə yürüdülən sionizm ideologiyasına əsaslanan siyasi xətt iflasa uğradı. Bununla da sionizm ifşa olundu. Əgər əvvəllər dünya ölkələrinin siyasi hakimiyyətləri belə İsrailin sionizmə əsaslanan və fanatizmi özündə əks etdirən xarici siyasət yürütdüyünə inanmırdılarsa, hazırda dünya ictimaiyyəti artıq hər şeyi bilir. Bununla da ölkələrin daxili ictimai rəyləri hökumətlərin İsraillə münasibətləri ilə bağlı ciddi təzyiq faktoruna çevrilir. Bu isə tarixdə ilk dəfə sionizmin çöküş prosesinin başlanması və suveren Fələstin dövlətinin yaranma perspektivini yaradır. Dünya Sionist Təşkilatı rəhbərliyinin İsrail hökumətini sərt tənqid etməsi və cinayətkar qrup adlandırması real mənzərəni özündə ehtiva edir”.

Ə.Zülfüqaroğlu hesab edir ki, Qəzzadakı uğursuzluğu arxa plana keçirmək üçün İsrail müxtəlif dövlətlərdə HƏMAS-ın siyasi rəhbərliyinə qarşı sui-qəsd taktikasını uğur formulu kimi təqdim etməyə çalışır:

“Dohada həyata keçirilən hücum da bundan qaynaqlanır. Artıq çıxış yolu qalmayan İsrail hökumət üzvləri ağlasığmaz addımlar atmaqla savaş coğrafiyasını genişləndirmək və ABŞ-ı prosesə cəlb etmək istəyir. Düşünürəm ki, Dohaya hücumla İsrail həm də atəşkəs danışıqlarına artıq yer qalmadığının mesajını verir. Bu isə, əlbəttə, Vaşinqtonun maraqlarına cavab vermir.

İsrail bütün mümkün vasitələrdən istifadə edərək bölgəni xaosa sürükləməkdə maraqlıdır. Bununla Tramp üzərində ciddi təzyiq yaratmağa, onun Yaxın Şərqlə bağlı mövqeyinin dəyişməsinə və suveren Fələstin dövlətinin yaranma perspektivini əngəlləməyə çalışır. Ona görə də hesab edirəm ki, bu hücumlar davamlı olacaq. Yəni Suriya, Livan, Yəmən və İranla yanaşı digər bölgə ölkələri də hədəfdə ola bilər. Amma bütün bunlar İsrail hökumətinin planlarının reallaşmasına səbəb olmayacaq. İsrail hökuməti artıq geridönüşü mümkün olmayan bir mərhələyə qədəm qoyub. Dohaya hücum da Təl-Əvivin əleyhinə işləyəcək və İsrail hökumətini daha da çətin vəziyyətə salacaq”.