İsrailin baş naziri Benyamin Netanyahu açıqlamasında qeyd edib ki, Son hadisələrdən sonra (İsmayıl Haniyə və Fuad Şükürün öldürülməsi – red.) Qəzza zolağında atəşkəsin təmin olunması və girovların azad edilməsi ilə bağlı İsrail və Fələstinin HƏMAS hərəkatı arasında razılığa gəlmək ehtimalı artıb. O bildirib ki, Fuad Şükürün öldürülməsi ilə əvvəllər razılaşmanın bağlanmasına mane olan “radikal elementlər” aradan qaldırıb.

Globalinfo.az-a danışan siyasi şərhçi Elvin Baxşalızadə deyib ki, Netanyahunun “Time” jurnalına müsahibəsi böyük rezonans doğurub:

“Netanyahu Fuad Şükür və İsmayıl Haniyənin ölümündən sonra HƏMAS-la mümkün atəşkəsə eyham vurub. Fikrimcə, İsrail rəhbərliyi burada razılaşma dedikdə HƏMAS-ın məğlubiyyətini və ram olunmasını nəzərdə tutur. Yəni hər şey İsrail dövlətinin maraqları çərçivəsində razılaşdırıla bilər. HƏMAS-ı məğlub etdikdən sonra isə növbəti hədəf “Hizbullah” olacaq.

Netanyahu hökuməti ölkənin tam təhlükəsizliyini bu şəkildə təmin etmək fikrindədir. Bu baxımdan Fuad Şükürün öldürülməsi “Hizbullah” rəhbərliyinə qarşı ciddi mesaj kimi qiymətləndirilməlidir.

“Hizbullah” tərəfdən İsrailə qarşı təhdidlər aradan qaldırılmalıdır. Əks halda qarşıdakı aylarda ordu Livana girib genişmiqyaslı müharibəyə başlayacaq. İsrail oktyabr ayında baş vermiş faciənin təkrarlanmaması üçün istənilən qarşıdurmaya getməyə hazır görünür”.