Son aylarda beynəlxalq siyasətdə artan gərginlik, xüsusilə Avropa və onun sərhədlərində baş verən silahlı münaqişələr, Fransa daxil olmaqla bir çox Qərb ölkələrini təcili strateji hazırlıqlara vadar edib. Fransa hökumətinin ölkə üzrə xəstəxanalara göndərdiyi və “böyük toqquşma” ssenarisinə hazırlığı nəzərdə tutan təlimatlar isə bu narahatlığın konkret nəticələrindən biridir. Sənədlərdə səhiyyə sisteminin genişmiqyaslı hərbi və ya mülki fövqəladə vəziyyətlərə hazır olması tələb edilir.

Bu addım təkcə ictimai sağlamlıqla bağlı deyil – Fransanın mümkün müharibəyə, yaxud genişmiqyaslı xarici təhlükəyə hazırlaşdığı kimi qiymətləndirilir. Bu barədə nüfuzlu “La Figaro” nəşri yazıb.

Sözügedən hazırlığın arxasında duran real səbəblər nədir? Söhbət hansı müharibə və ya toqquşmadan gedir? Fransa belə bir addımı niyə məhz indi atır?

Globalinfo.az-a danışan siyasi şərhçi Kənan Novruzov deyib ki, əslində bu, kifayət qədər diqqətçəkən məqamdır:

“Dünyada baş verən siyasi kataklizmlər və böhranlar fonunda Fransanın hansısa savaşa hazırlanması və ya sadəcə təhlükəsizlik tədbirləri görməsi mümkündür. Qeyd etmək lazımdır ki, bu hazırlıq yalnız hərbi hücum ehtimalı ilə deyil, eyni zamanda kiberhücumlar, terror təhlükəsi, miqrasiya axını və ya enerji böhranı kimi müxtəlif senarilərlə də əlaqəli ola bilər.

İndiki anda Fransanın hansısa ölkə ilə müharibəyə hazırlaşdığını düşünmürəm. Amma geosiyasi reallıqları nəzərə alsaq, Fransa və ya digər Qərb ölkələri gələcəkdə, hətta özləri istəmədən silahlı münaqişələrə cəlb oluna bilərlər. NATO-nun kollektiv müdafiə prinsipi, Ukrayna–Rusiya müharibəsinin genişlənmə riski və ya Yaxın Şərqdə artan gərginliklər bu ehtimalı daha real edir. Bu mənada, hazırlıq tədbirləri qaçılmaz görünür”.

K.Novruzov qeyd edib ki, yayılan məlumatlar təhrif edilmiş, konteksdən çıxarılmış da ola bilər:

“Media mühiti tez-tez informasiya manipulyasiyasına məruz qalır. Əvvəllər də oxşar hallar müşahidə olunub. İlkin təqdim olunan sənədlər və ya açıqlamaların sonradan daha fərqli mənalar daşıdığı ortaya çıxıb. Bu baxımdan, istənilən xəbərə tənqidi və ehtiyatlı yanaşmaq vacibdir”.