Fransa və Rusiyanın ötən il Rumıniyada keçirilən prezident seçkilərinin nəticəsinə müdaxilə etdiyinə dair iddialar beynəlxalq siyasi arenada gərginliyə səbəb olub. Proses zamanı “Teleqram” və bir sıra sosial şəbəkələrdə dezinformasiyaların yayıldığı qeyd edilib. Platformanın qurucusu Pavel Durov buna cavab olaraq bildirib ki, Fransa kəşfiyyatının rəhbəri Nikolya Lerner Rumıniyadakı seçkilər ərəfəsində konservativ səsləri məhdudlaşdırmağı xahiş edib, lakin o, razılaşmayıb. Paris Durovun iddialarını təkzib edib.

Rumıniyanın Xarici İşlər Nazirliyi isə prosesə müdaxiləyə görə Rusiyanı günahlandırıb. Rəsmi Moskva bəyanatın reallığı əks etdirmədiyini vurğulayıb və Durovun açıqlamalarına diqqət çəkib.

Fransa və Rusiya ilə bağlı iddialar nə dərəcədə həqiqətə uyğundur? Bu iki ölkənin adı Rumıniya ilə bağlı proseslərdə niyə hallanır?

Globalinfo.az-a danışan siyasi şərhçi Əli Zülfüqaroğlu deyib ki, hazırda Ukrayna cəbhəsində əks mövqedə olan dövlətlər bir-birinə qarşı hibrid savaş aparır:

“Onlar kiberhücumlar həyata keçirir və ümumiyyətlə müxtəlif səpkili hücumlar edirlər. Eyni zamanda üçüncü ölkələrdə fərqli siyasi proseslərə, o cümlədən seçkilərə təsir göstərməyə çalışırlar. Rumıniya yerləşdiyi strateji mövqeyinə görə, həm Rusiya, həm Avropa İttifaqı (Aİ), həm də Amerika Birləşmiş Ştatları üçün ciddi önəm daşıyır.

Xüsusilə bu ölkənin Aİ-yə üzvü olduğunu nəzərə alsaq, o zaman hakimiyyətdə hansı siyasi düşüncənin olması tərəflər üçün ciddi əhəmiyyət kəsb edir. Buna görə də, Fransa və Rusiyanın Rumuniyada prezident seçklərinə təsir etməyə çalışması gözlənilən haldır və istisna edilməməlidir”.