Suriyada Türkiyə ilə İsrail arasındakı gərginlik qlobal media orqanlarında ajiotaj yaratmaqda davam edir.

Publika.az xəbər verir ki, ABŞ-da Respublikaçılar partiyasının mətbuatda qalası sayılan “National İnterest” (Nİ) nəşri Konqres lobbilərindən topladığı məlumatlar işığında iki mühüm təhlil yazısı dərc edib.

Məqalələrdə Türkiyənin Suriyada hava qüvvələri, hava hücumundan müdafiə sistemləri, PUA və qabaqcıl radar sistemlərinə malik olduğu qeyd edilib. Sistemlər səbəbindən İsrailin İrana hava dəhlizinin bağlandığı və Netanyahunun Tehrana zərbə endirmə planlarının çətinləşdiyi də xatırladılıb.

Həmçinin İsrailin Türkiyəyə mümkün hücumunun NATO-ya hücum demək olduğu da vurğulanıb:

"İsrail son vaxtlar Suriyada hava hücumlarını gücləndirərək Türkiyəni regionda potensial təsir və nəzarət münaqişəsinə cəlb edib. İsrailin ötən həftə bir gecədə 25 hava hücumu təşkil etdiyi və iki hava bazasının tamamilə məhv edildiyi bildirilir. Həmçinin, Türkiyənin istifadə etdiyi hava bazalarına hücum edir. İki mühüm hava bazası, Tiyas (T4) və Hama iki ölkə arasında gərginlik nöqtəsinə çevrilib.

Türkiyə rəsmiləri NATO-dakı həmkarlarına İsrail Türkiyənin quru və ya hava qüvvələrinə hücum etdiyi təqdirdə, alyansın 5-ci maddəsinin işə salınması barədə xəbərdarlıq edib".

Digər tərəfdən, mənbələr Türkiyənin Palmira və Menaqdakı hava bazalarına hava hücumundan müdafiə və zenit sistemləri quraşdırmağa başladığını da paylaşır. Bu, İsrailin İrana hücum etmək üçün istifadə edəcəyi hava dəhlizinin bağlanması deməkdir:

"İsrail Türkiyənin Dəməşqə siyasi və kəşfiyyat təsirindən də narahatdır. Türkiyə bölgədəki hava bazalarına "Hisar-A", "Hisar-0+" və "Korkut" hava hücumundan müdafiə sistemlərini yerləşdirib. “Korkut” sistemi daha əvvəl Suriyanın İdlib bölgəsindəki əməliyyatlarda uğurla istifadə edilib.

Ankaranın bölgəyə yerləşdirdiyi döyüş maşınları arasında “Akıncı” və “Aksunqur” uzaq mənzilli PUA-lar da var. NATO üzvü Türkiyə ilə ABŞ-ın Yaxın Şərqdəki ən böyük müttəfiqi olan İsrail arasında baş verənlər regionda kiçik görünən münaqişələrin nə qədər böyük müharibə riski yarada biləcəyini ortaya qoyur”.