Məlum olduğu kimi, fevralın 27-də terror təşkilatı olan Kürdüstan Fəhlə Partiyasının (PKK) qurucusu və lideri Abdulla Öcalanın (Apo) tarixi müraciəti dərc olunub. O, partiya üzvlərini və tərəfdarlarını silahlarını yerə qoymağa və partiyanı ləğv etməyə çağırmışdı.

Publika.az xəbər verir ki, İsrail mətbuatı bu mövzunu diqqət mərkəzində saxlayır. İsrailin aparıcı "Hareetz" qəzeti prosesi şərh edərkən yazıb ki, PKK-nın Öcalanın tələbini yerinə yetirməsi Suriyada güc balansını dəyişdirə və İsrailin varlığını təhdid edə bilər.

"Türkiyə Bəşər Əsədin devrilməsindən sonra Suriyanı öz himayəsinə götürüb və indi onu təsir zonasına çevirməyi hədəfləyir. Türkiyə Rusiyanın yerini tutsa, İsrail üçün açıq olan Suriya hava məkanı bağlana bilər", - İsrail qəzeti qeyd edib.

"İsrail Suriyada qalan yeganə xarici güc olaraq Türkiyə ilə qarşı-qarşıya gələcək. Bundan əlavə, ABŞ administrasiyası İsrailə təzyiqləri artıra və Rəcəb Tayyib Ərdoğana Suriyada tam üstünlük əldə etmək üçün dəstək verə bilər", - nəşr vurğulayıb.