Azərbaycan artıq ikinci dəfə mühüm tranzit qərarı ilə gündəmdədir. Qazaxıstana məxsus yüklərdən sonra indi də Rusiya məhsullarının ərazimizdən daşınmasına “yaşıl işıq” yandırılıb. Rusiya Baş nazirinin müavini Aleksey Overçukun sözlərinə görə, Azərbaycan dəmir yollarından istifadənin mümkünlüyü artıq təsdiqlənib və yeni logistika marşrutu üzərində iş gedir.

Qazaxıstandan sonra Rusiyanın da mallarının Ermənistana daşınmasına icazə verilməsi regionda nələri dəyişəcək?

Globalinfo.az-a danışan politoloq Yusif Bağırzadə deyib ki, bu proses Rusiyadan Ermənistana və əks istiqamətdə yüklərin daşınmasına müsbət mənada təsir göstərəcək:

“Moskva ilə İrəvan arasında birbaşa dəmir yolu xətti yoxdur. Digər tərəfdən avtomobil yolunun xüsusilə qış aylarında işlək vəziyyətdə olmaması daşınmaların həcminə təsir göstərirdi. İndi isə yeni logistik marşrut həm Rusiya, həm də Ermənistan üçün yeni imkanlar açır. İndi daha uyğun, qısa və təhlükəsiz marşrut vasitəsilə yüklərin Azərbaycan üzərindən daşınması mümkün olacaq. Bu, eyni zamanda daha ucuz başa gəlir və nəticədə malların qiymətinə təsir edir”.

Politoloq bildirib ki, bütün bunlar Azərbacaynın tranzit ölkə olaraq mövqelərini gücləndirir:

“Azərbaycan həm tranzit daşımalardan maddi qazanc götürəcək, həm də siyasi mənada yeni təsir imkanları əldə edəcək. Söhbət təkcə Qazaxıstan və Rusiyadan da getmir. Şübhəsiz ki, tədricən bütün MDB və Avrasiya İqitsadi İttifaqı (Aİİ) ölkələri Ermənistana yük daşımalarını Azərbaycan üzərindən həyata keçirəcək. Bu isə ölkəmizin regionda mövqelərini bir az da gücləndirəcək. İrəvanın Bakının tranzit imkanlarından faydalanması bizə həm də “yumşaq gücdən” istifadə üçün imkanlar açır. Bu, həm də İrəvana Zəngəzur dəhlizinin fəaliyyəti ilə bağlı əlavə təsir üsulu deməkdir”.