Ərəb liderlərinin Qəzzanın taleyi ilə bağlı müzakirələr üçün Ər-Riyada toplaşması bir sıra iddiaların yaranmasına səbəb olub. Belə ki, cümə günü Səudiyyə Ərəbistanı, İordaniya, Qətər, Misir, Birləşmiş Ərəb Əmirlikləri (BƏƏ), Küveyt və Bəhreyn liderləri görüşüblər. Qapalı keçən danışıqlar barədə açıqlama verilməsə də, burada ABŞ Prezidenti Donald Trampın qəzzalıların deportasiyası ilə bağlı planına qarşı variantların nəzərdən keçirildiyi bildirilib.

Məlumata görə, 4 martda Qahirə tərəfindən rəsmi şəkildə elan olunacaq plana əsasən, HƏMAS Qəzzada hakimiyyətdən əl çəkəcək, əvəzində ərəb dövlətləri oradakı bərpa işlərini maliyyələşdirəcəklər. Növbəti mərhələdə isə İsrail ilə Fələstinin birgə mövcud olacağı iki dövlətli həll yolu gündəmdə olacaq.

Globalinfo.az-a danışan politoloq Zeynal Əmrəliyev deyib ki, hazırda Qəzza ilə bağlı iki plan mövcuddur:

“Birincisi, Trampın planıdır. Bu, Qəzzanın tamamilə dağıdılaraq insanların Misir və İordaniyaya köçürülməsi, yəhudi yaşayış məskənlərinin salınmasını nəzərdə tutur. Ağ Ev rəhbəri bununla üç məsələni həll edəcək. HƏMAS-ı tamamilə bitirəcək. İsrailin Qəzzanı ilhaq etməsinə şərait yaradacaq. Nəhayət, iki dövlətli sülh prosesinə mane olacaq. Onun fikrincə, yaradılması nəzərdə tutulan Fələstin dövlətinin ərazisinə Qəzza vilayəti, İordan çayının sahilləri və Qüds daxil olmalıdır. Qəzzanın əldən çıxarılması isə Fələstin dövlətçiliyinə son qoyacaq. İsrailin arzuladığı da məhz budur”.

Ekspert qeyd edib ki, Misir və İordaniya fələstinlilərin ərazilərinə köçürülməsinə hazır deyil:

“Digər plana əsasən, Misir çalışır ki, dağılmış Qəzzanı zəngin ərəb dövlətləri hesabına bərpa edərək ABŞ-ı üstələsin. Həmçinin HƏMAS-ı hərbi təşkilatdan siyasi təşkilata çevirərək həm fələstinli qruplar arasında ittifaqı bərpa etsin, həm də Fələstin dövlətçiliyini gücləndirsin. Eyni zamanda İsrailin hücum riskini də aradan qaldırsın. Ərəb ölkələri arasında ABŞ və İsraillə birbaşa əlaqəyə girən olmasa, Misirin planı baş tuta bilər”.