İsrailin dördmərhələli Qəzza planı üzə çıxıb.

Publika.az xəbər verir ki, planla bağlı İbrani dilində çıxan “Maariv” qəzetində yazılıb. Plan Ağ Evə də göndərilib.

Netanyahu Qəzza zolağına hücumlar bitirdikdən sonrakı dövr üçün yol xəritəsi layihəsi hazırlayıb.

Netanyahunun ABŞ rəsmiləri və əlaqədar tərəflərlə paylaşdığı planın birinci mərhələsinə görə, hücumlar başa çatdıqdan sonra Qəzza zolağında qurulacaq hərbi idarə ora daxil olacaq humanitar yardımların və mülki əhalinin inzibati işləri ilə məşğul olacaq.

İkinci mərhələdə Səudiyyə Ərəbistanı, Misir, Mərakeş, Birləşmiş Ərəb Əmirliklərinin (BƏƏ) iştirakı ilə qurulacaq ərəb koalisiyası ilə birlikdə Qəzza zolağında FƏTH və HƏMAS-ın olmadığı yeni Fələstin administrasiyası qurulacaq.

Planın üçüncü mərhələsində Qəzzada qurulacaq yeni Fələstin administrasiyası uğur və sabitliyə nail olarsa, bu idarənin İordan çayının qərb sahilinə də hakim olması üçün yeni islahat hazırlanacaq. Bundan əlavə, Fələstin təhsil sistemində tədris planı da dəyişdiriləcək.

Son mərhələdə 2-4 il ərzində işğal altındakı Qəzza və İordan çayının qərb sahilində Fələstin administrasiyasının rəhbərliyi altında ordusuz Fələstin dövləti qurulacaq .

İsrail həmçinin qeyri-qanuni yəhudi məskənlərini boşaltmadan torpaqların yeni Fələstin dövlətinə verilməsini də nəzərdən keçirəcək.

Qəzetin paylaşdığı planla bağlı İsrail hökumətindən hələlik rəsmi açıqlama verilməyib.

Roza Şəfiyeva