ABŞ Qəzzada yerli sakinlərin müvəqqəti deportasiyasında mövqeyinin qəti olduğunu açıqlayıb.

Globalinfo.az xəbər verir ki, bu fonda artıq 5 ərəb ölkəsi (Səudiyyə Ərəbistanı, BƏƏ, Qətər, Misir və İordaniya) ABŞ-ın mövqeyinə etiraz edib. Lakin bu gün açıqlama verən ABŞ Dövlət katibi Marko Rubio ölkəsinin Qəzza sektorunu HƏMAS-dan azad etməkdə həlledici rol oynamağa hazır olduğunu söyləyib:

“Qəzza HƏMAS-dan azad olmalıdır. Prezidentin (Donald Tramp – red.) dediyi kimi, ABŞ bu işdə həlledici rol oynamağa hazırdır”.

Tramp bundan öncə Qəzza ilə bağlı təklifinin müvəqqəti xarakter daşıdığını açıqlayıb. O hətta mövqeyinin reallaşdırılması üçün ABŞ ordusunu bölgəyə göndərməyə hazır olduğunu söyləyib. Maraqlıdır ki, Tramp belə bəyanatı İsrail Baş naziri Benyamin Netanyahunun ABŞ-a səfəri fonunda verib.

Netanyahu isə ABŞ-da önəmli açıqlama verib. O, ölkəsinin Səudiyyə Ərəbistanı ilə münasibətlərin normallaşmasına bağlı olduğunu və tərəflər arasında artıq sülhün əldə olunduğunu deyib. Lakin Ər-Riyaddan yaşananlar fonunda heç bir açıqlama gəlməyib. Diqqətçəkən məqam Netanyahunun səfərindən az öncə Səudiyyə Ərəbistanının ABŞ Dövlət katibi Marko Rubioya Qəzza ilə bağlı etiraz məktubu göndərən ölkələr sırasında yer alması olub.

Yaşananlar fonunda gözlənilməz açıqlama Türkiyədən gəlib. Türkiyə xarici işlər naziri Hakan Fidan Netanyahunun Vaşinqtonda olması fonunda İsraillə münasibətləri yenidən nəzərdən keçirə biləcəklərini deyib. Fidan bunun üçün əsas şərtin fələstinlilərin öldürülməsinin dayandırılması olduğu vurğulanıb:

“Əgər fələstinlilərin qətli dayansa, vəziyyətin yaxşılaşdırılması ilə bağlı addımlar atılsa, Türkiyə İsraillə bağlı qərarını yenidən nəzərdən keçirə bilər. Bizim mövqeyimiz qətidir: Qəzzada soyqırımı dayandırmaq istəyirik”.

Qeyd edək ki, İordan çayının qərb sahili BMT tərəfindən Fələstin ərazisi olaraq tanınır. Ərazinin cəmi 17%-i tam olaraq Fələstin administrasiyasının nəzarətindədir, geri qalan hissələr isə İsraillə ortaq və ya İsrailin tam nəzarətindədir. BMT bu ərazilərin İsrail işğalı altına ərazi sayır.