Ukraynanın nadir torpaq metalları ehtiyatları arasında litium, kobalt kimi minerallar var. Hazırda bu istiqamətdə böyük mübarizə gedir. Məlumata görə, Kiyev litium ehtiyatlarına görə Avropada ilk sıralarda yer alır. Ukraynanın sərvətlərini ələ keçirən və ya pay sahibi olan ölkələrin ciddi uğur qazanacağı bildirilir.

Britaniya, Almaniya kimi qüdrətli ölkələrin Ukrayna sərvətlərinə ortaq olmaq barəsində planları ola bilərmi? Avropa bu məsələdə ABŞ-a məğlub olmaq istəmir deyə bilərikmi?

Globalinfo.az-a danışan politoloq Elçin Xalidbəyli deyib ki, hazırda Ukraynanın təbii sərvətləri uğrunda mübarizə başlayıb:

“Bu mübarizədə Avropa İttifaqı ölkələrinin hansısa uğur qazanacağı və yaxud da pay ələ keçirəcəyi inandırıcı görünmür. Çünki Ukraynanın təbii sərvətlərinə ABŞ göz dikib. Donald Tramp administrasiyası Ukraynanın təbii sərvətlərinin istismarı ilə bağlı rəsmi Kiyevə müqavilənin layihəsini artıq göndərib. Ukraynadan bu müqaviləni dərhal imzalamağı tələb edir. Bəzi məlumatlara görə, rəsmi Kiyev təbii sərvətlərinin, xüsusilə də mineralların dəyəri 2-7 trilyon dollar arasındadır. Bu olduqca fantastik sərvətdir. ABŞ Ukraynanın bu sərvətlərini ələ keçirməyə cəhd göstərir. Tramp administrasiyası bu müqaviləni Ukraynaya imzalatmaqda əsas arqumenti ondan ibarətdir ki, ABŞ Ukrayna müharibəsində 100 milyard dollar həcmində maliyyə xərcləyib. İndi həmin borcun geri qaytarılmasının vaxtıdır”.

Politoloqun sözlərinə görə, Ukrayna həmin xərcləri öz təbii sərvətləri hesabına qaytara bilər:

“Tramp administrasiyası açıq-aşkar Ukraynanın bölüşdürülməsi prosesinə start verib. Ukraynanın rəsmi mövqeyi soruşulmadan Rusiyanın ələ keçirdiyi torpaqlar ABŞ tərəfindən elə onun nəzarətinə verilir. İşğal olunmuş ərazilərdə də təbii sərvətlər, xüsusilə də daş, kömür yataqları mövcuddur. Bunlar da Rusiyanın əlinə keçmiş olacaq. Ukraynanın gələcək taleyi çox qaranlıq görünür”.