Donald Tramp administrasiyasının Kiyevə təklif etdiyi Ukraynanın təbii sərvətlərinə ABŞ-ın çıxışı haqqında saziş Vaşinqtonun mineral və neft-qaz ehtiyatlarına, limanlara və digər infrastrukturlara nəzarətini nəzərdə tutur.

Publika.az xəbər verir ki, bu barədə “The Telegraph” yazır.

“Donald Trampın tələbi ölkənin ən mühüm mineral ehtiyatları üzərində ABŞ-ın nəzarətindən çox-çox kənara çıxır. Bu, limanlardan və infrastrukturdan tutmuş neft və qaza qədər hər şeyə aiddir”, - nəşr yazır.

Sənədə əsasən, Vaşinqton və Kiyev “münaqişənin düşmən tərəflərinin Ukraynanın bərpasından fayda görməməsini” təmin etmək üçün birgə investisiya fondu yaratmalıdır.

Tramp administrasiyası Birləşmiş Ştatların Ukraynanın resursların hasilatından əldə etdiyi cari gəlirlərin 50 faizini, həmçinin “üçüncü tərəflərə verilmiş bütün yeni (resursların çıxarılması) lisenziyalarının” dəyərinin 50 faizini almasını istəyir. Belə gəlir ABŞ-ın xeyrinə yığılacaq. Danışıqlara yaxın mənbə qəzetə deyib: “Bu bənd “əvvəl bizə pul ver, sonra uşaqlarını yedizdir” deməkdir”.

Razılaşmada deyilir ki, "bütün gələcək lisenziyalara münasibətdə ABŞ ixrac üçün yararlı olan faydalı qazıntılardan ilk olaraq imtina etmək hüququna malik olacaq".

Teleqraf qeyd edir ki, Ukrayna prezidenti Vladimir Zelenskinin özü ABŞ-a Ukrayna resurslarına çıxış imkanı vermək ideyasını irəli sürüb. Nəşrin yazdığına görə, o, güman edib ki, Amerika şirkətləri Ukraynada fəaliyyətə başlayacaq və Vladimir Putin üçün “tələ” yaradacaq və bu, onun yenidən Ukraynaya hücumunun qarşısını alacaq. Bu, xüsusilə, bəzi faydalı qazıntı yataqlarının ölkənin şərqində, cəbhə xəttinə yaxın və ya Rusiyanın işğal etdiyi ərazilərdə yerləşməsinə əsaslanır.

“O, yəqin ki, müharibədə məğlub olmuş təcavüzkar dövlətlərə şamil olunan şərtlərlə qarşılaşacağını gözləmirdi. Onlar Almaniya və Yaponiyaya 1945-ci ildə tətbiq edilən maliyyə sanksiyalarından daha pisdir”, - “The Telegraph” qeyd edir.