İsrailin baş naziri Benyamin Netanyahu ABŞ prezidenti Donald Trampın Qəzza ilə bağlı hazırladığı 15 bəndlik sülh planını rədd edib.

Publika.az xarici mətbuata istinadən xəbər verir ki, bu, Netanyahu ilə Tramp arasında nadir hallarda baş verən açıq fikir ayrılığı kimi qiymətləndirilir.

Netanyahu bildirib ki, İsrail ordusu HƏMAS tamamilə silahsızlaşdırılmayana qədər Qəzzadan geri çəkilməyəcək.

“İsrail 15 bəndlik sənədi qəbul etmir. HƏMAS silahsızlaşdırılmayana qədər İsrail Müdafiə Ordusu heç bir geri çəkilmə həyata keçirməyəcək. Söhbət həqiqi, formal olmayan silahsızlaşdırmadan gedir”, - Netanyahu deyib.

Trampın iyul ayında irəli sürdüyü plana əsasən, HƏMAS silahlarını təhvil verməli, bunun müqabilində İsrail qüvvələri Qəzzadan tamamilə çıxmalı və bundan sonra ərazinin idarəçiliyi müstəqil Fələstin milli komitəsinə verilə bilər.

Lakin Netanyahu əvvəlcə HƏMAS-ın tamamilə tərksilah edilməsini tələb edir. O, həmçinin ABŞ-ın Qəzza, Livan və İran müharibələrinin İsrailin razılığı olmadan dayandırılması istiqamətində təzyiq göstərdiyini bildirib.

Trampın Qəzza üzrə “Sülh Şurası”nın nümayəndəsi Nikolay Mladenov isə İsrailin mövqeyinə cavab olaraq planın dəyişmədiyini və onun “irəliyə doğru yeganə yol” olduğunu açıqlayıb.

Netanyahunun sərt mövqeyi Trampın regionda sülhə vasitəçilik etmək planlarına ciddi zərbə kimi qiymətləndirilir.

Qeyd edək ki, İsrail və ABŞ-da qarşıdakı seçkilər fonunda bu açıq qarşıdurmanın iki ölkə arasındakı münasibətlərə necə təsir edəcəyi diqqət mərkəzindədir.