Ukrayna prezidentinin aparat rəhbərinin müavini İqor Jovkva bildirib ki, NATO Ukraynanın istəklərini rədd edib və Kiyev təşkilata qoşulmaq üçün addım atmayacaq.

Publika.az xəbər verir ki, o, bu barədə Britaniyanın “Financial Times” qəzetinə müsahibəsində bildirib.

“NATO üzvləri bizim istəklərimizi rədd etdilər. Bununla bağlı heç nə etməyəcəyik”, - deyə o bildirib.

Jovkva ümid edir ki, alyansın Madriddə keçiriləcək sammitində qəbul oluna biləcək NATO-nun strateji konsepsiyasının hazırlanmasında Ukraynadakı münaqişə nəzərə alınacaq.

Onun fikrincə, əgər NATO üzvləri Avropa və Ukraynada baş verənlər barədə danışmasalar, o zaman bu konsepsiya növbəti mənasız sənədə çevriləcək. O, həmçinin qeyd edib ki, Qərb Rusiyanın Ukraynada gələcəkdə mümkün hərbi əməliyyatlarının qarşısını almaq üçün Kiyevə təhlükəsizlik zəmanəti verməlidir. Onun sözlərinə görə, Kiyev bu məsələdə ABŞ, Böyük Britaniya, Almaniya və Fransa nümayəndələri ilə danışıqlar aparır.