Almaniya kansleri Fridrix Mertsin rəhbərlik etdiyi Xristian-Demokrat İttifaqı ikili vətəndaşlığa qadağa qoymağı və Almaniya pasportunun alınması üçün dil tələblərini sərtləşdirməyi planlaşdırır.

Publika.az xəbər verir ki, bu barədə Britaniyanın “The Telegraph” qəzeti yazır.

Nəşrin məlumatına görə, partiyanın yüksəkrütbəli üzvləri ikili vətəndaşlığın qadağan edilməsini və vətəndaşlığa qəbul olunmaq istəyənlər üçün alman dilini bilmək tələblərinin sərtləşdirilməsini müzakirə edirlər.

XDS/XSS fraksiyasının hüquqi siyasət üzrə spikeri Günter Krings izah edib ki, pasportun alınması Almaniya cəmiyyətinə inteqrasiyanın son mərhələsi olmalıdır.

“Hesab edirəm ki, belə bir qayda işləməlidir: Almaniya vətəndaşlığını alarkən əvvəlkindən imtina etməyə borclusunuz. Əgər başqa ölkəyə köçürsünüzsə və orada həmişəlik qalmaq niyrətindəsinizsə, nə üçün əvvəlki vətəndaşlığınızı saxlamağınızın bu qədər zəruri olduğunu anlamıram”, - deyə o bildirib.

Parlamentari həmçinin ölkənin siyasi həyatında iştirak etmək üçün alman dilini yaxşı bilmənin vacibliyini vurğulayıb.

Öz növbəsində XDS/XSS blokunda daxili siyasətə kuratorluq edən bundestaq deputatı Aleksandr Trom bildirib ki, onun partiyası vətəndaşlığın alınması müddətlərinin uzadılmasında təkid edir. Hazırda vətəndaşlığa qəbul üçün Almaniyada beş il qanuni yaşamaq kifayətdir.