İsrailin hərbi-siyasi kabinetinin Livanla atəşkəs sazişini təsdiqlədiyi barədə məlumat vermişdik.

Publika.az xəbər verir ki, İsrail televiziyasının 12-ci kanalının məlumatına görə, sənəd noyabrın 27-də Bakı vaxtı ilə səhər saat 11:00-dan 12:00-dək qüvvəyə minəcək.

“Əl Nahar” qəzeti İsrail və Livan arasındakı razılaşmanın təfərrüatlarını açıqlayıb. Razılaşma Livan ordusu hissələrinin bütün sərhədlər və keçid məntəqələri boyunca mərhələli şəkildə yerləşdirilməsini nəzərdə tutur, eyni zamanda, İsrail 60 gün ərzində öz ordusunu Livanın cənubundan tədricən sərhəd xəttinə çəkəcək.

Hər iki tərəfin razılığı ilə BMT Təhlükəsizlik Şurasının 1701 saylı qətnaməsinin icrasına nəzarət etmək üçün komitə yaradılacaq. Sazişin tərəfləri öhdəliklərin pozulması halları barədə komitəyə və BMT-nin Livandakı Müvəqqəti Qüvvələrinə məlumat verəcəklər.

Şiə qruplaşması “Hizbullah” və digər silahlı qruplaşmalar İsrailə qarşı heç bir hücum hərəkəti etməməli, İsrail ordusu dənizdə, quruda və havada hərbi əməliyyatlar keçirməyəcək.

Eyni zamanda, hər iki tərəfin üzərinə götürdüyü öhdəliklər onların özünümüdafiə hüququnu ləğv etmir. Livan hökuməti qeyri-qanuni qrupların fəaliyyətinin qarşısını almaq və silah qaçaqmalçılığının qarşısını almaq öhdəliyi götürür. Silah və sursat istehsalı ilə məşğul olan bütün qanunsuz obyektlər söküləcək, ehtiyatlar müsadirə olunacaq.

ABŞ davam edən sərhəd problemlərini həll etmək üçün Livan və İsrail arasında dolayı danışıqları asanlaşdıracaq.