Düz 65 il əvvəl – 13 avqust 1961-ci ildə Şərqi Almaniya hakimiyyəti Şərqi və Qərbi Berlini ayıran Berlin divarının tikintisinə başlayıb.

Globalinfo.az xəbər verir ki, əməliyyat 12-dən 13 avqusta keçən gecə həyata keçirilib. Şəhərin iki hissəsini birləşdirən küçələr bağlanıb, qatarların hərəkəti dayandırılıb, sərhəd boyunca ilk tikanlı məftil maneələri qurulub. Minlərlə insan bir gecədə qohumlarından, dostlarından və iş yerlərindən ayrı düşüb.

Gecəyarısı Şərqi Almaniyanın Milli Xalq Ordusunun bölmələrinə sərhədə doğru hərəkət etmək əmri verilib. Təxminən saat 01:00-da “Qızılgül əməliyyatı”nın icrasına başlanılıb. Dəmir yolu rəhbərliyinə Berlinin iki hissəsi arasında metro və şəhərətrafı qatarların hərəkətini dayandırmaq tapşırılıb.

Səhərə yaxın əsas keçid məntəqələrində barrikadalar qurulub, bəzi yerlərdə yollar qazılıb. Qərbi Berlin sakinləri hadisələrdən radio və digər kütləvi informasiya vasitələri vasitəsilə xəbər tutublar.

Saat 06:30-a qədər Şərqi Berlində 13 metro və şəhərətrafı qatar stansiyası bağlanıb. Sərhəd boyunca minlərlə hərbçi və yüzlərlə tank yerləşdirilib.

İlk maneələrdən bəziləri Bernauer-Ştrasse ərazisində qurulub. Burada sərhəd yaşayış binalarının arasından keçirdi. Gün ərzində şəhərin iki hissəsi faktiki olaraq bir-birindən tamamilə ayrılıb.

Beləliklə, sonradan “Berlin divarı” adlandırılacaq sərhəd sistemi formalaşmağa başlayıb. Divar 28 ildən artıq müddət ərzində Berlinin və bütövlükdə Avropanın bölünməsinin əsas simvollarından biri olaraq qalıb.

Berlin divarı yalnız 9 noyabr 1989-cu ildə, Soyuq müharibənin sona yaxınlaşdığı dövrdə insanların keçidinə açılıb. Divarın süqutu Almaniyanın yenidən birləşməsinin və Avropanın siyasi xəritəsinin dəyişməsinin ən mühüm simvollarından birinə çevrilib.