KTMT-nin analitik xidməti gecə-gündüz işləyir və Kursk vilayətində vəziyyətin inkişafını diqqətlə izləyir. Rusiya hərbi yardım tələb edəcəyi təqdirdə bütün lazımi prosedurları vaxtında həyata keçirəcəyik.

Publika.az xəbər verir ki, bu barədə hərbi blokun mətbuat xidməti məlumat yayıb.

"Hərbi münaqişənin KTMT-nin məsuliyyət zonasına keçməsi eskalasiyanın yeni mərhələsidir. Analitik xidmətimiz gecə-gündüz fəaliyyət göstərir. Biz vəziyyətin inkişafını diqqətlə izləyirik və təşkilatın nizamnaməsinə uyğun hərəkət edəcəyik. Katiblik və Rusiya Federasiyasının müvafiq dövlət qurumları müntəzəm olaraq məlumat mübadiləsi aparırlar. Lazım gələrsə, KTMT katibliyi bu halda nəzərdə tutulan bütün prosedurları müəyyən edilmiş vaxt çərçivəsində həyata keçirəcək”, - məlumatda bildirilir.

Təşkilat xatırladıb ki, hərbi yardımın göstərilməsi məsələsi yalnız üzv dövlətin rəsmi müraciəti olacağı təqdirdə yarana bilər. Lakin bu günə qədər Rusiyadan Kursk vilayətindəki vəziyyətlə bağlı belə bir müraciət olmayıb.