İsrail ilə Türkiyə arasında artan gərginlik müxtəlif siyasi dairələrdə müzakirələrə səbəb olub. Xüsusilə Azərbaycanın yaxın dostu və müttəfiqi olan iki ölkənin qarşı-qarşıya gəlməsi bir sıra suallar doğurub.

Təl-Əviv və Ankara arasındakı gərginliyin bu dəfə əvvəlkilərdən daha ciddi olduğu bildirilir. Bakının hazırkı vəziyyətdə necə bir yol izləyəcəyi isə ən çox maraq doğurdan məsələlərdəndir. Hətta Azərbaycanın Şuşa Bəyannaməsinin şərtlərinə uyğun olaraq Türkiyəyə açıq dəstək verəcəyinə dair fikirlər səsləndirilir.

Sözügedən sənəd Bakını Ankara ilə xarici təhdidlərə qarşı paralel fəaliyyət göstərməyə vadar edəcəkmi?

Globalinfo.az-a danışan siyasi şərhçi Turab Rzayev deyib ki, mövcud Türkiyə-İsrail gərginliyi Azərbaycan qarşısında çətin seçim qoymur:

“Türkiyə təbii olaraq istəyəcək ki, Azərbaycan yanında olsun, onu dəstəkləsin. Eynilə İsrail də bənzər formada dəstəyimizi gözləyə bilər. Amma unutmamaq lazımdır ki, Türkiyə İsrail ilə açıq müharibəyə getmir. Yəni gərginlik siyasi ritorikalar ilə məhdudlaşır.

Bu iki ölkə dəfələrlə bənzər situasiyalar içərisində olub. Hətta indikindən daha ağır bir vəziyyət 2010-cu ildə baş vermişdi. Azərbaycan o zaman da iki ölkə arasında tərəf tutmamışdı. Doğrudur, indi Ankara ilə Bakı arasında imzalanan Şuşa Bəyannaməsi var və iki ölkə müttəfiqdir. Amma bu bəyannamənin icrası üçün tərəflərdən biri mütləq digərindən yardım istəməlidir. Dediyim kimi İsrail və Türkiyə müharibə etmədiyi üçün Ankara Bakıdan hər hansı yardım istəməyəcək”.

“Azərbaycan üçün həm Türkiyə, həm də İsrail mühüm müttəfiqlərdir. Yəni bu iki ölkə arasında tərəf tutma ehtimalı olsa belə çalışacaq ki, onları uzaqlaşdırsın. 2010-cu ildən bu günə qədər Bakı qeyri-rəsmi şəkildə məhz buna çalışır”, – T.Rzayev deyib.