Ermənistanın Baş naziri Nikol Paşinyan Zəngəzur dəhlizinin ölkə ərazisinə düşən hissəsində işlərin gələn ildən başlanacağını açıqlayıb. Paralel olaraq, sərhədin delimitasiyası üzrə komissiyanın sədri, Paşinyanın müavini Mqer Qriqoryan isə TRIPP layihəsi ilə Zəngəzurda qeyri-adi demarkasiya prosesinin həyata keçirilə biləcəyini söyləyib.

Qriqoryanın bəyanatı Vaşinqton anlaşmasından sonra amerikalı nümayəndə heyətinin İrəvana intensiv səfərlərinin fonunda xüsusi diqqət çəkir. Analitiklərin fikrincə, bu, ABŞ-ın işlərin sürətləndirilməsi üçün Ermənistanı müəyyən mənada tələsdirməsi təəssüratını yaradır.

Qriqoryan “qeyri-adi demarkasiya prosesi” deyəndə nəyi nəzərdə tutur?

Globalinfo.az-a danışan politoloq Kazım Kazmov deyib ki, Ermənistan hökuməti son zamanlar yenidən anklavlar məsələsini gündəmə gətirir:

“Başda Nikol Paşinyan olmaqla, dövlət rəsmiləri bu məsələ ilə bağlı son dövrlər diqqətçəkən fikirlər səsləndirirlər. Əlbəttə ki, bu açıqlamalara rəsmi Bakı hələlik cavab verməyib.

Qriqoryanın bəyanatı isə çox nüanslar daşıyır. Unutmamalıyıq ki, sovet hökuməti qurulduqdan sonra Azərbaycanın bir çox torpaqları – Naxçıvandan 657 kvadrat kilometr ərazi və bir sıra kəndlər Rusiyanın vasitəsi ilə Ermənistana verilib. Rəsmi İrəvan ədalətli demarkasiyadan bəhs edirsə, burada nəyə istinad edəcəyini açıq göstərməlidir.

Qriqoryandan qeyri-adi elan: Azərbaycanlıların gözlədiyi tarix bilindi, lakin...

Ümumilikdə proses əvvəlki xəritələr əsasında davam etdirilə bilər. Bununla belə, yekun qərarı Azərbaycan verəcək. İrəvan Bakı ilə razılaşmalıdır. O ki qaldı demarkasiya məsələsinə, açıq şəkildə deməliyik ki, Qriqoryan da digər rəsmilər kimi açıqlamalar verir, amma rəsmi İrəvan çox ləng hərəkət edir. Ermənistan tarixi ədalətə əməl etmək istəmir. Azərbaycan isə öz torpaq bütövlüyünü qorudu, Qazaxın işğalda olan kəndlərini geri aldı.

Hələ Kərki məsələsi də var. Hesab edirəm ki, sonda bu məsələ də həllini tapacaq. TRIPP layihəsini birbaşa bu mövzu ilə əlaqələndirmək doğru deyil. Demarkasiya prosesinin davam etdiyi müddətdə dəhlizlə bağlı da sürətli addımlar atıla bilər. Yəni Ermənistan bu məsələdə bəhanə gətirməməlidir”.