Türkiyənin Sözcü TV kanalının efirində bu ölkənin tanınmış siması Nevzet Çiçək deyib ki, “Nikol Paşinyanın təhlükəsizliyini Türkiyə xüsusi təyinatlılarının əsgərləri təmin etməlidir”. O xatırladıb ki, Paşinyan erməni cəmiyyətini “böyük Ermənistan” xülyasından əl çəkməyə və indiki Ermənistanı sərhədləri ilə qəbul etməyə çağırıb. Çiçək Ermənistan hökuməti başçısının helikopteri ilə bağlı son insidenti də xatırladıb. O, bu işin Türkiyədə narahatlıq doğurduğunu vurğulayıb.

İddiaların nə dərəcədə əsası var? Türkiyə Paşinyanın təhlükəsizliyini təmin edə bilərmi?

Globalinfo.az-a danışan AMEA Qafqazşünaslıq İnstitutunun şöbə müdiri, tarix üzrə fəlsəfə doktoru, dosent Elnur Kəlbizadə deyib ki, Ermənistanda uzun illər ərzində təbliğ olunan türkə nifrət psixologiyasının aradan qaldırılması istiqamətində Nikol Paşinyanın verdiyi açıqlamalar erməni cəmiyyətində böyük rezonans doğurur:

“Bəzi şəxslər “böyük Ermənistan”, qondarma soyqırım iddiaları ilə ölkənin inkişaf edə bilməyəcəyini dərk edirlər. Uzun illər ərzində təbliğ olunan bu yalanın böyük mifdən,saxtakarlıqdan ibarət olduğunu başa düşürlər. Dünya erməniləri arasında elə qruplar var ki, onların fiziki və mənəvi varlığı bu saxta ideologiyalara bağlıdır. Həmin qruplar bu ideologiyaya qarşı fəaliyyət göstərən şəxslərə münasibətdə kifayət qədər aqressivdirlər.
Hələ sovet dövründə müxtəlif erməni terror siyasi qrupları gizli şəkildə sıravi ermənilərdən “ümumerməni işi” naminə pul toplayırdılar. Pulu ödəməyən şəxsləri isə öldürürdülər. Bunun ən bariz nümunəsi Sumqayıt hadisələri zamanı bir erməninin bu şəhərdə yaşayan müxtəlif erməni milliyyətindən olan şəxslərə qarşı törətdiyi terror aktıdır”.

Elnur Kəlbizadənin sözlərinə görə, regionda normallaşmanın təmin edilməsi naminə addımlar atan Nikol Paşinyan və ətrafındakı şəxslərə qarşı terror, siyasi təşkilatlarının Sarkisyan, Köçəryan cütlüyünün hansısa təxribatçı addımlar atması mümkündür:

“Türkiyə demokratik ölkədir. Fikir müxtəlifliyi, söz azadlığı var. Nevzet Çiçək də buna əsasən öz fikirlərini bildirir. Türkiyənin xüsusi təyinatlıları və ya hüquq-mühafizə orqanları o halda Paşinyanın təhlükəsizliyini təmin etməlidir ki, o, Türkiyəyə səfər etmiş olsun. Ümumiyyətlə beynəlxalq hüquqa görə sözügedən proses-yəni bir ölkənin digər ölkənin rəsmisinin təhlükəsizliyini təmin etməsi yalnız qarşılıqlı razılığa əsasən baş tuta bilər”.

Türkiyəli politoloq Hüsamettin İnaç ise deyib ki, Nikol Paşinyan 44 günlük Vətən müharibəsindən sonra lazımi dərsi aldığı görünür:

“Bu müddətdə özünün və ölkəsinin təhlükəsizliyini təmin etmək üçün Rusiyadan, ardınca da Avropadan dəstək almağa çalışan Paşinyan heç bir nəticə ala bilmədi. Dövlət təhlükəsizliyini sərhədlərinin qorunmasında görür. Bu çox əhəmiyyətli bir yanaşmadır və bunun üçün Paşinyanın dəstəklənməsi lazımdır. Paşinyan hər nə qədər zaman-zaman Türkiyə və Azərbaycan əleyhinə açıqlamalar versə də hazırda Azərbaycanın ərazi bütövlüyünü, erməni soyqırımın olmadığını qəbul edib. 4 kənd Azərbaycana geri qaytarıldı. Düşünürəm ki, Ermənistan Baş nazirinin təhlükəsizliyi Türkiyə tərəfindən təmin edilməlidir. O, həm Azərbaycana, həm də Türkiyəyə lazımdır. Yekun sülh müqaviləsinin imzalanması, sərhədlərin müəyyənləşməsi Paşinyanın hakimiyyəti dövründə mümkündür”.