"Avropa İttifaqı Rusiyaya qarşı 20-ci sanksiyalar paketini hazırlayır".

Teleqraf xəbər verir ki, bu barədə mətbuat konfransında Avropa İttifaqının xarici işlər naziri Kaya Kallas bildirib.

Onun sözlərinə görə, gələn il Ukraynanın daha çox maliyyəyə ehtiyacı olacaq.

"Bir neçə variant var, lakin dondurulmuş Rusiya aktivlərindən istifadə Ukraynanın müdafiə qabiliyyətini gücləndirməyin ən bariz yoludur. Bu, həm də Rusiyaya zamanın onun tərəfində olmadığını göstərmək üsuludur. Müharibələri ilk növbədə pulu və ya əsgəri tükənənlər itirir. Ona görə də biz Rusiyaya 20-ci sanksiya paketi vasitəsilə təzyiq göstərməyə davam edirik. Sanksiyalar, şübhəsiz ki, beynəlxalq tərəfdaşlarımız tərəfindən dəstəklənəndə daha yaxşı işləyir”, o bildirib.

Diplomatın sözlərinə görə, Avropanın müdafiə hazırlığına gəldikdə, Aİ doqquz sahədə potensial boşluqları aradan qaldırmaq üçün aydın yol xəritəsi təqdim edib:

"Bu boşluqları doldurmaq üçün işlər indi başlayır. Problemsiz hərbi mobillik Avropanın müdafiəyə hazırlığını təmin etmək üçün vacibdir. Biz qoşunları və hərbi texnikanı ehtiyac duyduğumuz yerdə hərəkət etdirməyi bacarmalıyıq".

“Gələn həftə Avropa Komissiyası ilə birlikdə yollarımızın, körpülərimizin, tunellərimizin, dəmir yollarımızın, hava limanlarımızın və digər infrastruktur layihələrimizin genişmiqyaslı qoşun hərəkətlərinə uyğunlaşdırılması, zəruri hallarda bir-birlərinə kömək etmək üçün nəqliyyat resurslarının birləşdirilməsi və Avropada qoşunların yerdəyişməsi üçün icazələrin alınması prosesinin sürətləndirilməsi təkliflərini özündə əks etdirən qoşunların hərəkətliliyinin artırılması planını təqdim edəcəyəm”, - deyə Kallas bildirib.