Yanvardan Çin sahil mühafizə gəmiləri Yaponiya hərbi aviasiyasının təyyarələrinə Pekinin iddia etdiyi Şərqi Çin dənizində Yaponiyanın nəzarətində olan Senkaku adaları yaxınlığında hava məkanını tərk etmələri barədə xəbərdarlıqlar etməyə başlayıb.

Teleqraf.com xəbər verir ki, bu barədə Yaponiyanın “Kyodo” agentliyi məlumat yayıb.

Çin tərəfi xəbərdarlıq edir ki, yapon təyyarələri Diaoyu adaları (Senkaku) ətrafındakı Çinin hava məkanını poza bilər.

Əvvəllər də Yaponiya təyyarələrinə vaxtaşırı adalara yaxınlaşan Çin döyüş gəmiləri tərəfindən oxşar xəbərdarlıqlar göndərilirdi, yanvardan isə yaxınlıqda patrul xidməti aparan sahil mühafizə gəmiləri xəbərdarlıq etməyə başlayıb.

Eyni zamanda, Yaponiya təyyarələrinə xəbərdarlıq edən Çin gəmiləri arasında zenit sistemləri ilə təchiz edilmiş gəmi də görünüb.

Tokio artıq diplomatik kanallar vasitəsilə Pekinə etiraz edib, bu cür xəbərdarlıqların yolverilməzliyini bildirib.

Çin lideri Si Cinpin Diaoyu Dao üzərindəki suverenliyini qorumaq üçün səylərin artırılması əmrindən sonra Çinin sahil mühafizəsi yapon döyüş təyyarələrinə xəbərdarlıq etməyə başlayıb.

Keçən il Çin gəmiləri 352 gün ərzində hər gün ərazidə olub, bu da 2012-ci ildən bəri rekorddur.

Cəmi 7 kvadratkilometr sahəsi olan Senkaku/Diaoyu arxipelaqı Çin sahillərindən 330 və ən yaxın Yaponiya adasından 410 km məsafədə yerləşir. Adalar Yaponiya ilə Çin arasında uzun müddətdir davam edən mübahisənin mövzusudur və gərginlik mənbəyidir.

Müəllif: Mənsur Rəğbətoğlu