Növbədənkənar prezident seçkisindən sonra dərin islahatların aparılması, bir çox sahədə yeniliklərin olması gözlənilir. 2018-ci ildə seçkidən dərhal sonra şok kadr təyinatları oldu. Ondan bir neçə ay sonra demək olar, iqtidar komandasının vitrini dəyişdirildi. Prezident Administrasiyası, Nazirlə Kabineti yaşlı məmurlardan təmizləndi. Hüquq mühafizə orqanlarının rəhbərləri yeniləndi. İdarəetmədə də müəyyən islahatlara gedildi.
7 fevral seçkisindən sonra hansı dəyişikləri ola bilər? Bəzi ekspertlər bu mövzuda maraqlı proqnozlar səsləndiriblər. Baş verəcək yeniliklər haqda fikirlərini bölüşüblər. İndi hamı iki sonrakı Azərbaycanda nələrik, kimlərin dəyişəcəyini maraqla gözləyir.
Globalinfo.az-a danışan Milli Məclisin deputatı Hikmət Babaoğlu deyib ki, bütün cəmiyyətlərdə islahatların aparılması zərurəti həmişə var:
“Çünki inkişaf islahatları, islahatlar da inkişafı şərtləndirir. Bu mənada da Azərbaycanda daima islahatlar həyata keçirilir. Həmin islahatlar isə çoxşaxəli xarakter daşıyır.
Prezident seçkiləri isə xüsusi əhəmiyyətə malikdir. Seçkilərdən sonra bütövlükdə siyasi komanda yenilənir. Azərbaycanda fevral ayının 7-də növbədənkənar prezident seçkiləri keçiriləcək.
Azərbaycanın ərazi bütövlüyünün bərpa olunması, yeni iqtisadi münasibətlər sisteminin formalaşmağa başlaması yeni islahatları lüzumlu edir. Seçkidən sonra bu istiqamətlərdə dərin islahatların keçirilməsi də gözləniləndir”.
Respublikaçı Alternativ Partiyasının (REAL) icra katibi, iqtisadçı ekspert Natiq Cəfərli isə vurğulayıb ki, ən böyük gözlənti Azərbaycan konstitusiyasının yenilənməsi ilə bağlıdır:
“Ərazi bütövlüyümüzün bərpasının ardınca inzibati ərazi vahidlərinin də yenidən qurulmasına start verməlidir. Sosial, iqtisadi problemlərin həllində sistemli məqamlar aradan qaldırılmalıdır. Kiçik rayonlara ehtiyac yoxdur. Prezidentin yaratdığı 14 iqtisadi rayon Şərqi Zəngəzur və Qarabağ da daxil inzibati ərazi vahidinə çevrilməli, tam hüquqlu idarəetmə forması olmalıdır. Bəzi paralelliklər aradan qalxmalıdır. Prezidentin şəxsi nümayəndəlik institutu və icra hakimiyyəti institutu var. Bu, doğru deyil. İcra hakimiyyəti institusional olaraq ləğv edilib, seçkili orqanlara, bələdiyyələrə verilməli və prezidentin şəxsi nümayəndəlik institutunun gücləndirilərək nəzarət və yönləndirici funksiyaları artırılmalıdır. Nazirlər Kabinetinin statusu aydınlaşdırılmalıdır. Parlamentin səlahiyyəti gücləndirilməlidir”.
Safura Bənnayeva
Globalinfo.az