Rusiya, Aİ, ABŞ üçbucağında vurnuxan Ermənistan rəsmi Bakıya sanki meydan oxuyur. Hər nə qədər rəsmi İrəvan istədiyi nəticələrə nail olmasa da prosesin yönünü dəyişməyə çalışır. Proses belə olan təqdirdə sülh danışıqları dalana dirənib.

Maraqlıdır, ABŞ ikiüzlü siyasət yürüdür? Sülh danışıqları yenidən harada başlayacaq? Qərb özü bilərəkdən prosesləri bu cür çıxılmaza salır? Rusiyanın bu mərhələdə mövqeyi bizi qane edirmi?

Mövzu ilə bağlı Globalinfo.az-a danışan politoloq Qabil Hüseynli deyib ki, Ermənistanın Azərbaycana meydan oxumağa imkanı yoxdur:

“Rəsmi İrəvan yaxşı başa düşür ki, regionda növbəti genişmiqyaslı bir müharibə Ermənistan üçün fəlakətlə nəticələnəcək. Digər tərəfdən, Ermənistan ərazi itkilərinə də məruz qala bilər.

Nikol Paşinyan uzun zamandır sülh müqaviləsinin imzalanmasını və Rusiya təsirindən Ermənistanı çıxarmaq istəyir. Lakin bu onun üçün heç də asan deyil. Ermənistan da revanşistlər, ultramilliyyətçilər, Rusiyaya sadiq 5-ci kolon bu məsələdə Paşinyana ciddi maneə törədir. Bundan başqa, Paşinyanın fikrini yayındıran Fransa faktoru da var.

Rəsmi Paris də sülhün əldə edilməsini istəmir. İndiki məqamda Ermənistanın Fransanın dəstəyinə ehtiyacı var. Amma müharibə bitəcəyi təqdirdə İrəvanın Fransanın dəstəyinə ehtiyacı qalmayacaq. Bu və digər faktorlar Paşinyanı sülhdən uzaq tutur. O, ki qaldı ABŞ və Qərbə, mən onların ikiüzlü siyasət yeritdiyini düşünmürəm.

Aİ və Vaşinqton sülhün əldə edilməsində maraqlıdır. Bu istiqamətdə müxtəlif görüşlər keçirilib, uğurlu nəticələr əldə edilib. Rusiya ilə müqayisədə ABŞ və Aİ-nin yanaşması və təklifləri daha məqbuldur. Rusiya proseslərə daha konstruktiv yanaşırmış kimi görünə bilər. Amma Moskva sülhün əldə edilməsində maraqlı deyil. Ümumiyyətlə Rusiyanın məqsədi çiy bir müqavilə ilə prosesi bir müddət səngitməkdir. Yəni tam həll Kremlə sərf etmir. İndiki məqamda Rusiyaya sadəcə Ukrayna müharibəsi bitənəcən vaxt udmaq lazımdır”.

Turan Rzayev
Globalinfo.az