“Düşünmürəm ki, ilin sonuna qədər Ermənistanla imzalanması ehtimal edilən sülh müqaviləsinin taleyi 10 noyabr 2020-ci ildə imzalanan üçtərəfli müqavilənin taleyinə bənzəyə bilər. Üçtərəfli müqavilənin zəmanətçisi Rusiya idi. Proseslərin gedişinə bir növ Kreml nəzarət etməli idi və edirdi. Zənnimcə, indiyə qədər proseslərin ləngiməsi, sülh danışıqları ilə bağlı nüanslar, bir sıra məsələlərdə gecikmələr, Ermənistanın baş naziri Nikol Paşinyana daxili təzyiqlərlə bağlı idi”.

Bunu Publika.az-a açıqlamasında politoloq Qabil Hüseynli deyib.

Politoloq bildirib ki, 10 noyabr razılaşmasının müddəalarının bu vaxta qədər icra olunmaması baş nazir Nikol Paşinyanın xarakterindəki müəyyən nüanslarla bağlı idi:

“Digər tərəfdən, bu məsələyə əsas təsiredici qüvvə kimi Kremli göstərmək olar. Amma bu dəfə sülh müqaviləsi imzalanarsa və budəfəki müqavilənin bağlanmasında Avropa Birliyinin əli olacaqsa, o zaman vəziyyət başqa cür olacaq. Ermənistan bağlanan müqavilənin şərtlərinə əməl etməyə borclu qalacaq. Üstəlik, Amerika Birləşmiş Ştatları da bu prosesə yardım vədi verib. Düşünürəm ki, belə olan halda Ermənistanla Azərbaycan arasında imzalanacaq sülh müqaviləsinin icrası da normal şəkildə gedə bilər. Eyni zamanda, ondan geriyə dönüş də mümkünsüz olacaq. İndiki məqamda ən ideal variant odur ki, super dövlətlər kənara çəkilsin. Azərbaycan Respublikasının Prezidentinin elan etdiyi kimi, Gürcüstan vasitəsilə iki dövlətin razılağa gəlməsi daha yaxşı nəticələr verə bilər. Əslində bu variant ehtiyat variant kimi nəzərdə tutulur. Amma hələ ki, bu “musiqini” sifariş verən müxtəlif güc mərkəzləridir. Proses məhz onların hərəkətləndirdiyi istiqamətlər üzrə idarə olunur”.

Qeyd edək ki, Ermənistanın baş naziri Nikol Paşinyan bu ilin sonuna qədər Bakı ilə İrəvan arasında sülh müqaviləsinin imzalana biləcəyi anaonsunu verib.