"Ermənistanda yeni prezidentin seçilməsi ilə Azərbaycanla Ermənistan arasında sülh müqaviləsinin imzalanması ehtimalları güclənir, çünki Vahan Xaçaturyan öz çıxışlarında Ermənistanla, regionda olan dövlətlərlə sülh, təhlükəsizlik və əminamanlıq şəraitində yaşamağın daha üstün olduğunu bildirib, daha çox özünü sülh tərəfdarı kimi göstərib".

Bunu Milli.Az-a açıqlamasında Sosial Tədqiqatlar Mərkəzinin Daxili siyasətin təhlili departamentinin baş məsləhətçisi, politoloq İlyas Hüseynov deyib.

O bildirib ki, Ermənistan üçtərəfli bəyanatların məsuliyyətini dərk edərək mövqe nümayiş etdirməlidir:

"Armen Sarkisyandan fərqli olaraq V. Xaçaturyanın baxışlarında revanşist fikirlər demək olar ki, yoxdur. Eyni zamanda onun önəmli tərəfi də bundan ibarətdir ki, Levon Ter-Petrosyanın dövründə Vahan Xaçaturyan İrəvan şəhərinin meri olub. Hazırki baş nazir Nikol Paşinyanın da Levon Ter-Petrosyanla yaxın olması daha çox Petrosyanın kadrı kimi Xaçaturyanı göstərir. Paşinyan Xaçaturyanın siyasi baxışlarına və mövqeyinə bir qədər də yaxın olan bir şəxs kimi özünü göstərir.

Nikol Paşinyan son açıqlamasında bildirib ki, Azərbaycanla sülh danışıqlarına başlamağa hazırdırlar. Bu, Nikol Paşinyanın yenidən ikili oyun oynamasının tərkib hissəsi kimi görünsə də rəsmi İrəvan yaxşı anlayır ki, hazırda Rusiya-Ukrayna müharibəsi gedir və rəsmi Moskvanın diqqəti bu müharibəyə yönəlib.

Eyni zamanda Moskva Bəyannaməsi Azərbaycanın güc yoluna əl ataraq öz ərazisində olan problemləri həll etməyə və eyni zamanda üçtərəfli birgə bəyanatların öhdəliklərinin zorla qəbul etidirilməsinə çalışa bilər. Bununla bağlı olaraq Ermənistan həm sülh carçısı olan prezidenti hazırki iqtidar təyin etdi, eyni zamanda Nikol Paşinyan da sülh mövqeyindən çıxış edərək daha çox regionda problemlərin sıfra endirilməsinin tərəfdarı olduğu kimi özünü göstərir. Ermənistan həm 10 noyabr, həm 11 yanvar, həm də 26 noyabr (Soçi) bəyanatlarının məsuliyyətini dərk edərək regionda olan problemlərə mövqe nümayiş etdirməlidir.

Digər önəmli məsələ həm də sərhədlərin delimitasiyası ilə yanaşı Azərbaycanın ərazi bütövlüyünün Ermənistan tərəfindən qəbul edilməsidir. Ermənistanda həm də diplomatik münasibətlərin qurulması, BMT-yə üzv qəbul olunma ilə bağlı 30 illik bir dövrə nəzər salmaq üçün mərasim də keçirilib. Bu o deməkdir ki, Ermənistan həm də beynəlxalq birliyin üzvüdür. Bu üzvülüklə yanaşı olaraq Azərbaycanın ərazi bütövlüyünü BMT kimi universal bir platformada məhz beynəlxalq tanınmış sərhədlər çərçivəsində qəbul edib. Ermənistan da bu reallıqları qəbul edərək sülh masası arxasında Azərbaycanla oturmalıdır. Hər hansısa qeyd-şərtlərin irəli sürülməsi və Ermənistanın öz maraqlarından çıxış edərək bəzi istiqamətlərin müəyyənləşdirilməsi də yolverilməzdir. Çünki artıq Avropa İttifaqının da, Rusiyanın da mövqeyi regionda təhlükəsizlik spektorunun gücləndirilməsindən ibarətdir.

Təbii ki, dünyada hazırda digər önəmli prioritetlər var, siyasi gündəlik dəyişib. Lakin Azərbaycanla Ermənistan arasında sülh müqaviləsinin imzalanması yarana biləcək müəyyən problemlərin də preventiv üsulla həllini müəyyən etmək baxımından sülh müqaviləsinin imzalanması önəmlidir. Lakin sülh müqaviləsinə gedən yolda ilk-öncə sərhədlərimizin tanınması, ərazi iddialarına qarşı irəli sürülən tələblərin aradan götürülməsi və sərhədlərin delimitasiyasından sonrakı prosesdə isə onların demarkasiyasıdır. Bu baxımdan böyük bir yol qət edilməlidir və hazırda Ermənistanın sərgilədiyi mövqe yalnız bəyanatla məhdudlaşır, əməli-praktiki fəaliyyəti isə biz müşahidə etmirik. Ona görə də Ermənistanın baş naziri və hazırki prezident ictimai rəyi də bu səpkidə formalaşdırmalıdırlar ki, sülh ən önəmli çıxış variantıdır. Revanşizm isə dövlətin və dövlətçiliyin sonunu gətirə bilər. Ona görə də Ermənistanda ictimai rəydə neqativ əhval-ruhiyyəni, revanşist mövqeyi neytrallaşdırmaq üçün Ermənistan siyasi rəhbərliyi genişmiqyaslı fəaliyyət həyata keçirməlidir".