Fransa prezidenti Emmanuel Makronun Qarabağ nizamlanmasındakı rolu ilə bağlı bəyanatları dəstəklənmir.

Publika.az xəbər verir ki, bunu Rusiya Xarici İşlər Nazirliyinin sözçüsü Mariya Zaxarova brifinq zamanı deyib.

"Bu cür bəyanatlardan sonra adamda belə bir təəssürat yaranır ki, prezident Makron təvazökarlıqdan uzaq biridir. O çox pafoslu danışır”, - Zaxarova bildirib.

"Təəssüf ki, Makron belə səmərəli işin praktiki nəticələri barədə heç nə deməyib", - rusiyalı diplomat əlavə edib.

Qeyd edək ki, bir müddət əvvəl ARF Daşnaksütyun partiyası Fransa prezidenti Emmanuel Makronun Marseldə nüfuzlu erməni dairələri ilə görüşünün təfərrüatları barədə məlumat yayıb. Məlumata görə, Fransa lideri xüsusilə Əliyevə Paşinyandan daha çox təzyiq etdiyini bildirib. Daha sonra Azərbaycan Xarici İşlər Nazirliyi Fransa dövlətinin başçısını Bakıya qarşı qərəzli münasibətdə ittiham edib.

Mehti Kamiloğlu