Avropa Şurasının prezidenti Şarl Mişel Ukraynadakı Kaxovka bəndinin vurulmasında Rusiyanı günahlandırıb və bunun hərbi cinayət olduğunu deyib.

Elchi.az bu barədə Trthaber.com-a istinadən xəbər verir.

Kaxovka bəndinə görünməmiş hücumdan şoka düşdüyünü bildirən Mişel mülki infrastrukturların məhv edilməsinin müharibə cinayəti olduğunu vurğulayıb.

Mişel qeyd edib ki, buna görə Rusiya və birlikdə hərəkət edənləri məsuliyyətə cəlb edəcəklər. O, iyunun 29-30-da keçiriləcək Avropa İttifaqı (Aİ) Liderlər Zirvə toplantısında bu məsələni qaldıracağını və daşqın xəbərdarlığının verildiyi bölgəyə daha çox yardım göndərilməsini təklif edəcəyini açıqlayıb.

Xatırladaq ki, Ukraynanın Xerson vilayətində yerləşən Rusiyanın nəzarətində olan Kaxovka Su Elektrik Stansiyası (SES) bombardman nəticəsində dağıdılıb. Ərazinin su basma təhlükəsi ilə üzləşdiyini qeyd edən Ukrayna hakimiyyəti bəndin vurulmasına görə Rusiya ordusunu məsuliyyət daşıdığını qeyd edib.