Artıq prosesə ABŞ və Avropa İttifaqı mühüm təsir göstərir, ona görə də Nikol Paşinyanın sülhdən başqa yolu yoxdur.

Bunu Publika.az-a açıqlamasında politoloq Qabil Hüseynli deyib.

Politoloq bildirib ki, sülh sazişi Ermənistana həm siyasi, həm də maddi dividendlər qazandıra bilər. Odur ki, Armen Qriqoryanın sənədin ilin sonunadək imzalanması ilə bağlı fikirlərində bədbin notlar axtarmağa gərək yoxdur. Hər iki tərəf bu istiqamətdə irəliləyir. Təbii ki, Azərbaycan tərəfi daha konstruktiv mövqe nümayiş etdirir.

"Lakin sərhədlərin delimitasiyasının SSRİ Baş Qərargahının 1975-ci ildəki xəritələrinə əsasən aparılması fikrinin Azərbaycan tərəfindən də qəbul edilməsi təsdiq edir ki, hər iki tərəf sülhə can atır. Düşünürəm ki, Rusiyanın müəyyən fitnə-fəsadları olmasa, ABŞ və Avropa dövlətləri sülhyaratma prosesini ilin sonunadək uğurla başa çatdıra biləcəklər", - Q.Hüseynli əlavə edib.

Politoloq onu da bildirib ki, əgər delimitasiya prosesini 1936-cı ilə qədər olan xəritələr əsasında tələb etsək, onda gərək Ermənistanın bir dövlət kimi əsasları sıradan çıxsın. Çünki həmin xəritələr Azərbaycan Xalq Cümhuriyyəti dövründə ölkəmizin ərazisinin təqribən 20 min kv.km-dən çox hissəsinin alınaraq Ermənistana verilməsini sübuta yetirir.

Qeyd edək ki, Ermənistan Təhlükəsizlik Şurasının katibi Armen Qriqoryan Ermənistanın İctimai Televizyasına müsahibəsində Azərbaycanla Ermənistan arasında sülh sazişinin ilin sonunadək imzalana biləcəyini vurğulayıb.

Mehti Kamiloğlu