Avropa İttifaqı Ukraynada hərbi əməliyyatların birinci ildönümü ərəfəsində BMT Baş Assambleyasında səsverməyə çıxarılacaq qətnaməni yayıb.

Publika.az “The Washington Post”a istinadla xəbər verir ki, qətnamə hərbi əməliyyatları dayandırmağa və sülhə, eləcə də respublikanın suverenliyi, müstəqilliyi, birliyi və ərazi bütövlüyünə çağırır.

WP mənbələri iddia edir ki, Ukrayna Aİ-dən BMT-yə üzv dövlətlərlə məsləhətləşərək belə bir qətnamə hazırlamağı xahiş edib. “Beləliklə, Kiyev beynəlxalq ictimaiyyətin dəstəyini almaq istəyir”, - adının açıqlanmasını istəməyən Aİ diplomatı bildirib. Sənəd mübahisələrin sülh yolu ilə həllinə çağırır.

Yekun qətnamə layihəsində, həmçinin “döyüş əməliyyatlarının dayandırılmasına” çağırılır və açıq şəkildə bir il əvvəl “Ukraynanın tammiqyaslı işğalına” istinad edilir və BMT Nizamnaməsinə uyğun olaraq Ukraynada “hərtərəfli, ədalətli və davamlı sülhə” tezliklə nail olunmasının zəruriliyi bir daha təsdiqlənir”. Sənəd münaqişəyə son qoyulmasını tələb etməklə yanaşı, BMT üzvlərini və beynəlxalq təşkilatları sülhə nail olmaq üçün “diplomatik səylərə ikiqat dəstək verməyə” çağırır.

Təklif olunan qətnamə, həmçinin Baş Assambleyanın Rusiyanın “bütün hərbi qüvvələrini Ukraynanın beynəlxalq səviyyədə tanınmış sərhədlərindən dərhal, tamamilə və qeyd-şərtsiz çıxarması” ilə bağlı əvvəlki tələbi ilə səsləşir.