ABŞ Senatı Dövlət Departamentini Çeçenistan, Gürcüstan, Suriya və Ukraynada baş verənlərə görə Rusiyanın terroru maliyyələşdirən dövlət kimi tanımağa çağıran qətnamə qəbul edib.

Publika.az xəbər verir ki, sənəddə II Çeçenistan müharibəsində Rusiyanın terror aktlarına əl atdığı, o cümlədən, Suriya və Donbasda analoji hallara yol verdiyi qeyd olunur.

“Rusiya prezidenti Vladimir Putinin göstərişi ilə atılan addımlar terror aktlarına sponsorluq etmək kimi qəbul olunur”, - sənəddə bu fikirlər əksini tapıb.

Qətnamə ABŞ dövlət katibini Rusiyanı terroru dəstəkləyən dövlətlər siyahısına daxil etməyə çağırır, lakin əlavə edilir ki, “bu qətnamə hərbi güc tətbiq etməyə, yaxud ABŞ Silahlı Qüvvələrinin müdaxilə etməsinə icazə kimi şərh edilməməlidir”.

Dövlət katibi Entoni Blinken bildirib ki, ABŞ Rusiyanın Ukraynadakı addımlarını “terrorçuluğun dövlət sponsoru” meyarlarına uyğunluğunu nəzərdən keçirir: "Lakin etiraf edir ki, Rusiyaya belə bir statusun verilməsi onun üçün praktiki baxımdan çox az şeyi dəyişdirəcək".