İsveç Xarici İşlər Nazirliyinin rəhbəri Tobias Billstrem türkiyəli həmkarı Mövlud Çavuşoğlu ilə görüşdən sonra ölkəsinin gələn il Şimali Atlantika Alyansına daxil olmasını başa çatdıracağını təsdiq edə bilməyib.

Cebhe.info xəbər verir ki, bu barədə TASS məlumat yayıb.

Billstremin sözlərinə görə, İsveçin NATO-ya daxil olması üçün dəqiq şərtlərin olmamasına baxmayaraq, müəyyən irəliləyiş var.

“Mən konkret vaxt çərçivəsi təyin etmək istəmirəm. Üçtərəfli memorandumun bütün şərtləri yerinə yetirilən kimi biz Türkiyə parlamenti tərəfindən ratifikasiyasının necə baş tutacağını görəcəyik”, - İsveç xarici işlər naziri izah edib.

Qeyd edək ki, noyabrın 30-da Billstrem NATO Nazirlər Toplantısının ikinci sessiyasında iştirak etmək üçün Buxarestə gəlib.

Həmçinin İsveç diplomatik departamentinin rəhbəri əlavə edib ki, noyabrın 29-da Türkiyə və Finlandiyanın iştirakı ilə məhsuldar görüş keçirilib.

"Mən hiss edirəm ki, irəliləyiş var, biz üçtərəfli memorandumun icrasına doğru irəliləyirik", - Billstrem yekunlaşdırıb.

Xatırladaq ki, daha əvvəl İsveçdə NATO-ya üzv olmaq üçün Türkiyədə seçkilərin bitməsini gözləməyəcəklərini bildirmişdilər.