Brüsseldə Finlandiya, İsveç və Türkiyə nümayəndə heyətləri arasında NATO-ya üzvlük məsələsinə dair keçirilən danışıqlarda irəliləyiş əldə edilib.

Publika.az xəbər verir ki, bu barədə Finlandiya Prezidentinin saytı məlumat yayıb.

Danışıqların NATO Katibliyində aparıldığı, Finlandiya nümayəndə heyətinə Prezidentin xarici siyasət və təhlükəsizlik məsələləri üzrə müşaviri Petri Hakkaraynen başçılıq etdiyi vurğulanır.

Müzakirələr təxminən beş saat davam edib. Qeyd olunub ki, bəzi məsələlərdə aydın irəliləyiş əldə olunub, digərləri üzrə isə konsensusa nail olmaq üçün vaxt tələb olunur.

Danışıqlarda əldə edilən irəliləyişlə bağlı paytaxtda müzakirələr aparılacaq.

Bildirilib ki, ümumi məqsəd müzakirələri mümkün qədər tez davam etdirməkdir.

Xatırladaq ki, mayın 18-də Finlandiya və İsveç Rusiyanın Ukraynadakı xüsusi hərbi əməliyyatı fonunda alyansa qoşulmaq üçün NATO-nun baş katibinə ərizə təqdim ediblər. Türkiyə bu müraciətlərə baxılma prosesinin başlamasını əngəlləyib.

Türkiyə Finlandiya və İsveçdən NATO-ya daxil olmasına razılıq verməzdən əvvəl silah ixracına qoyulan məhdudiyyətləri aradan qaldırmaq və PKK terrorçularına dəstəkdən imtina etmək üçün yazılı təminat tələb edir.