Milli Məclisin İnsan hüquqları komitəsinin sədri Zahid Oruc bu gün parlamentin iclasında AZAL-la bağlı məsələ qaldırıb.

Publika.az xəbər verir ki, deputat bu qurumun təyyarə biletlərinin qiymətinin baha olmasına diqqət çəkib.

“Azərbaycan vətəndaşının xaricə çıxışı üçün yeganə nəqliyyat vasitəsi olan təyyarə biletlərinin qiymətinin baha olması nəinki inhisarçı şirkətin vətəndaşlara ağır maliyyə yüküdür, eləcə də Hesablama Palatasının apardığı son auditdən göründüyü kimi, şirkətin borcu dövlətin iqtisadi təhlükəsizliyini təhdid edir. Müasir hava limanı, son sinif təyyarələr, yanacaq və təchizatı hökumət tərəfindən təmin olunan kompaniyanın vəziyyətinə diqqət yetirin.

Auditdən sitat: koronavirusla bağlı dövlətin göstərdiyi yardımın 35,3 milyon manatı əvvəlki illərin öhdəlikləri, kapital qoyuluşları, qeyri-kommersiya xarakterli, lüzumsuz ödənişlər və cərimələr, qabaqcadan təsdiqlənən bölgüyə aid olmayan istiqamətlərə xərclənib. Bank kreditləri və digər borclanmalar 2022-ci il yanvarın 1-nə 2,1 milyard təşkil edir və nəinki likvidliyə, eləcə də dövlət büdcəsinə əsaslı təhdiddir. Beləliklə, alternativ beynəlxalq uçuşlar həyata keçirən şirkətlərin olmadığı bir məkanda vətəndaş təkcə bir istiqamətə - Türkiyəyə gürcü və ermənilərdən 3 dəfə baha uçur.

Ona görə də Füzuli, Zəngilan və gələcəkdə hazır olacaq Laçın hava limanlarının idarəçiliyini AZAL-a vermək olmaz. Azad torpaqlarda hava limanları təkcə mülki deyil, həm də hərbi və təhlükəsizlik əhəmiyyəti daşıdığı üçün AZAL-ın hazırki idarəçilik modeli dəyişməlidir”, - deputat bildirib.