Türkiyə Prezidenti Rəcəb Tayyib Ərdoğan hesab edir ki, Rusiya Ukraynadakı münaqişəni tez bir zamanda bitirməyə çalışır.

Publika.az xəbər verir ki, o, Özbəkistanda Rusiya Prezidenti Vladimir Putinlə görüşdən sonra bu qənaətə gəlib.

“Mənim Özbəkistanda Putinlə geniş görüşlərim oldu. Mən başa düşürəm ki, onlar bunu mümkün qədər tez bir zamanda başa çatdırmağa çalışırlar. Bu situasiya böyük problemdir”, – deyə Ərdoğan PBS telekanalına bildirib.

Onun sözlərinə görə, tərəflər 200 əsirin mübadiləsi haqqında razılaşma imzalayıblar. “Bu, yaxşı nailiyyətdir... Digər tərəfdən bizim dostlarımız və texniki personal kənd təsərrüfatı məhsulları ilə bağlı məsələlərlə hərtərəfli məşğul olurlar. Və bu, təbii ki, hadisələrin yaxşı dönüşüdür. Amma burada Ukraynanın da Rusiya ilə eyni anlayışı göstərməsi vacibdir və bundan sonra bu münaqişəni, bu müharibəni dayandırmaq üçün qarşılıqlı meylli olmaq lazımdır”, – Türkiyə Prezidenti əlavə edib.

Ərdoğan qeyd edib ki, o, həm Vladimir Putin, həm də Vladimir Zelenski ilə danışıqlar aparır. Onun fikrincə, nəticə əldə etmək üçün iki prezidentlə danışmaq, onlardan birinin tərəfini tutmamaq lazımdır. “Əlbəttə, bunu da görmək vacibdir, insanlar təkcə Ukrayna tərəfdən deyil, həm də Rusiya tərəfdən ölür”, – o əlavə edib.

Rusiya-Ukrayna danışıqları may ayında dayandırılıb. Nümayəndə heyətlərinin sonuncu üzbəüz görüşü martın 29-da İstanbulda baş tutub. Vladimir Putin ötən həftə demişdi ki, Moskva münaqişənin tezliklə başa çatması üçün hər şeyi etməyə hazırdır, lakin Kiyev danışıqlardan imtina edir. Ukrayna prezidentinin ofisinin rəhbərinin müşaviri Mixail Podolyak daha sonra bəyan edib ki, o, danışıqlarda və ya prezidentlərin görüşündə heç bir məna görmür.