İnsanlar arasında belə bir inam vardır ki, hər kəsin özünün daşı vardır. “Daşımı başına salma”, “Mənim daşım ağırdır”, “Mən daşdan yaranmışam”, “Öz daşı öz başına düşsün” və s.
İnsanın daşını çevirməklə onun xasiyyətini dəyişmək olur. Yəni onun xasiyyəti pisləşir, evdə dava-dalaş olur. Bu zaman deyirlər: “Elə bil daşı çevrilib”. Təkcə insanların deyil, heyvanların daşını da çevirmək olar. Xüsusən durna qatarının səfi pozulanda deyirlər ki, kimsə daşlarını çevirib. Daşın sehirli qüvvəyə malik olmasını, onları qırarkən qığılcım verməsi ilə əlaqələndirirlər. Belə daşlar “dəmir daş” adlanır.

***
Şərur rayonunda ziyarətçilər gələn Axura kəndində pir yerində prizmatik-konusvari formada olan böyük qara daş vardır. Maraqlı nadir göy cisminə bənzər daş ətrafında isə adətən başqa pirlərdə olduğu kimi kiçik yumurta formalı, qara daşlar-meteoritlər qoyulmuşdur. Xüsusilə, bura gələnlər arasında uşağı olmayan ailələr daha çox olurlar. Onlar pirdə gəzib-dolanıb niyyət edirlər, Allahdan övlad istəyirlər və gətirdikləri qurbanlıq heyvanlarını kəsdirib, ətini yoxsullara ehsan kimi paylayarlar.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından