Ermənistanın viza və möhürlərindən Ağrı dağının təsviri götürülüb. Məlumata görə, ölkənin Nazirlər Kabinetinin 11 sentyabr tarixli qərarı ilə artıq yeni möhürlər hazırlanıb.

Bu addımın məhz baş nazir Nikol Paşinyanın tapşırığı və təşəbbüsü ilə atıldığı bildirilir. Qərar, Türkiyə və Ermənistan arasında münasibətlərin normallaşması prosesində Ankaraya jest kimi dəyərləndirilir.

Ermənistanın milli simvolu hesab edilən Ağrı dağının ölkənin rəsmi sənədlərindən silinməsi ictimai inteqrasiya prosesinə necə təsir göstərəcək? Növbəti addım Bakı ilə sülh prosesi çərçivəsində Konstitusiya dəyişikliyi ola bilərmi?

Globalinfo.az-a danışan siyasi şərhçi Füzuli Qurbanov deyib ki, Ermənistan cəmiyyəti və siyasi dairələri Ağrı dağının tarixən də, indiki dövrdə də onlara aid olmadığını anlamalıdırlar:

“Buna görə Ağrı dağı ermənilərin saxta milli simvoludur. Paşinyan da o ləkəni təmizləyir. Bu, Türkiyədən daha çox öz tarixlərinə və erməni cəmiyyətinə jestdir. Yəni vəziyyəti anlasalar, ermənilərin real ictimai inteqrasiya imkanları yarana bilər.

Bundan başqa, məsələ Azərbaycan–Türkiyə birliyinə münasibətlə bağlıdır. Bunu unutmayaq! Deməli, Türkiyəyə edilən jest həm də Azərbaycana aiddir. Bu, eyni zamanda Ermənistan Konstitusiyasında dəyişikliyin olacağına işarə də ola bilər! Fikrimcə, İrəvanın başqa yolu yoxdur. Bakı sülh üçün ədalətli və müasir beynəlxalq hüquqa tam uyğun şərt irəli sürüb!”