Qızılgül Roma Papasının emblemidir. Xristianlıqda- şəhidliyi, həm də xeyriyyəçiliyi, cənnət çiçəyi olmasına, ətirinə görə gözəlliyi, mükəmməlliyi və Yaradana təşəkkürü ifadə edir.
Qədim Misirdə İsidaya həsr edilən, saf sevgini, arınmanı ifadə edən qızılgüllər, İsida ilə Osirin misteriyalarında istifadə edilirdi. (Qədim Misirdə itburnu bitkisi gəncliyin, sevginin, gözəlliyin, kişi mövqeyinin və gücünün simvolu idi).
İslamda Peyğəmbərin “iki gözü”, “iki gülü” hesab edilən Həsənlə Hüseynin qanını simvolizə edir.
Qızılgül tibbdə, aromaterapiya və kosmetologiyada geniş istifadə edilir. Gülçiçəklilər/Rosaceae ailəsinə mənsub olan qızılgülün bir çox xəstəliklərdə şəfaverici xüsusiyyətləri məlumdur. Eramızın I əsrində Böyük Pliniy qızılgül yağının 32 müxtəlif müalicəvi xüsusiyyətini yazmışdı.
1930-cu illərdə “C” vitamininin kəşf edilməsi, onun iltihab əleyhinə təsiri və bu vitaminin gülçiçəklilər ailəsinə mənsub olan itburnunun tərkibində daha çox olması böyük marağa səbəb oldu. Qızılgül 1930-cu illərə qədər də istifadə edilirdi (British farmakopeya), Apothocary cövhəri anginaya qarşı yazılırdı.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından