Uşaqlıq boynu xərçəngi. Uşaqlıq boynu xərçəngini törədən əsas səbəblərdən biri kimi əsasən Human Papilloma Virus (HPV) adlanan törədicinin olduğu sübut edilmişdir ki, bu virusun da təxminən 100 tipi vardır. Bunlardan xüsusilə HPV tip 16 və 18 yüksək onkogenik riskə sahibdir. HPV əsasən cinsi yolla yoluxan virusdur. Bu virusun bəzi tipləri kondiloma accuminata adlandırılan ziyilə bənzər səpgilərlə müşayiət olunur. Cinsi aktivliyə erkən yaşda başlayan, çox sayda cinsi partnyoru olan və ya partnyorunun bir neçə cinsi partnyoru olan, 7 və çox hamiləlik keçirən, siqaret çəkən qadınlarda uşaqlıq boynu xərçəngi riski daha yüksəkdir. Amma müsbət hal odur ki, müntəzəm ginekoloji müayinələr və Pap-smear/ HPV DNA müayinə testləri ilə uşaqlıq boynu xərçəng önü xəstəliklərinə diaqnoz qoyula bilir. Pap-smear nədir və nə vaxt smear testə başlamaq lazımdır? Pap-smear testi sadə və sürətli bir müayinə metodudur. Müayinəyə ilk cinsi münasibətdən 3 il sonra və ya 21 yaşından sonra başlanılır. Son elmi yanaşmalara görə 21-29 yaş arası 3 ildə bir, 30-65 yaş arası 5 ildə bir dəfə HPV testi ilə birlikdə (ko-test) tətbiqi məsləhət görülür. Hamilələrdə hamiləliyin ilk 3 ayında smear alına bilər. Daha əvvəldən alınan smear nəticəsində patologiya aşkar edilməmişdirsə və son 10 ildə 3 ard-arda neqativ smear nəticəsi olan 65 yaş və üstü qadınlar müayinə olunmaya bilər. Əgər nəticə pozitiv olarsa; Smear testi hüceyrə səviyyəsində dəyişikliyi müəyyənləşdirməyimizə kömək edir. HPV taraması isə daha əvvəl də qeyd etdiyimiz kimi servikal xərçəngin səbəbi olan virusu aşkarlamağa imkan verir. Smear testi nəticəsində patologiya aşkar edilərsə və ya HPV testinin nəticəsində yüksək onkogenik tiplər pozitiv çıxarsa testin təkrarı, kolposkopiya, şübhəli hissələrdən biyopsiya götürülə bilər. Smear testi edilməzdən ən azı 2 gün olmaqla cinsi pəhriz, yuyunmamalı, hər hansı bir vaginal müalicə almamalı və müayinə də daxil edilməklə heç bir ginekoloji müdaxilə olmamalıdır. Uşaqlıq boynu xərçəngi illər ərzində inkişaf etdiyinə görə uzun müddət simptomsuz da ola bilər. İlk diaqnoz smear testi ilə qoyulur. Əgər sizdə atsiklik qanaxma, menstruasiya müddətinin və ya qanaxma miqdarının artması, cinsi münasibət sonrası qanlı ifrazat, ağrı, xoşagəlməz iyli və müalicəyə müsbət cavab verməyən axıntı varsa, təcili olaraq ginekoloqunuza müraciət edin.
“Ailə həkimi klinikası” F. Rüstəmova [b][/b]