Ermənistanın Baş naziri Nikol Paşinyan 2026-cı ilin büdcə müzakirələri zamanı ordunun sürətlə inkşaf etdiyini söyləyib. O, Ermənistan Silahlı Qüvvələrinin ölkənin beynəlxalq səviyyədə tanınmış sərhədlərindən kənarda heç bir fəaliyyət öhdəliyinin olmadığını bildirib.

Paşinyan həmçinin gündəlik danışıqda “döyüş qabiliyyətli ordu” ifadəsini “müdafiə qabiliyyətli ordu” anlayışı ilə əvəzləməyi zəruri hesab etdiyini vurğulayıb.

Globalinfo.az-a danışan politoloq İlqar Vəlizadə deyib ki, təkcə Ermənistan deyil, KTMT-nin digər üzv dövlətləri də ərazi hüdudlarından kənarda hərbi əməliyyatlarda iştirak etmək barədə düşünmür:

“Paşinyanın son açıqlamaları, əlbəttə ki, diqqət çəkir. Ümumiyyətlə, biz onun açıqlama və bəyanatlarına baxdıqda keçmiş “dənizdən dənizə böyük Ermənistan” tezisini yox, “real Ermənistan” konsepsiyasını tətbiq etməyə çalışdığını görə bilirik.

Paşinyanın “real Ermənistan” konsepsiyası qonşu ölkələrin ərazilərinə iddia irəli sürmədən, dinc şəkildə əlaqələrin qurulmasına hesablanıb. Burada həm də daxili maraqlar nəzərə alınmalıdır. Baş nazir eyn zamanda yeni Konstitusiyanın qəbuluna da hazırlaşır. Artıq bu istiqamətdə real işlər görülür. Yəni qarşımızda təkcə bəyanatlar verən deyil, həm də praktik addımlar atan bir Paşinyan var”.

Politoloq qeyd edib ki, Paşinyan Ermənistanın xarici siyasəti kimi, daxili siyasətini də sıfırlayır:

Təbii olaraq bu, hərbi sferadan da yan keçmir. Hesab edirəm ki, həm “döyüş qabiliyyətli ordu” ifadəsinin “müdafiə qabiliyyətli ordu” anlayışı ilə əvəzlənməsi, həm də “Ermənistan ordusunun beynəlxalq səviyyədə tanınmış suveren ərazisindən kənarda hər hansı məsələni həll etmək kimi bir vəzifəsi yoxdur” ifadəsi bir-birinə bağlıdır.

Paşinyanın dediklərini KTMT ilə əlaqələndirməkdənsə, daha çox Rusiya aspektində dəyərləndirmək lazımdır. Yəni o, faktiki olaraq “Rusiya üçün döyüşməyəcəyik” deyir. Baş nazir fərqindədir ki, Moskva ondan və ölkəsindən Cənubi Qafqazda maraqlarını təmin etmək üçün alət kimi istifadə edir. Ona görə də artıq siyasi xəttini dəyişmək qərarına gəlib.

Proses bu şəkildə davam edərsə, Ermənistan Azərbaycan, Gürcüstan və Türkiyə ilə problemlərini həll edə bilər. Bunun üçün mütləq şəkildə davamlı təmaslar və praktik addımlar zəruridir”.

Hərbi ekspert, ehtiyatda olan polkovnik Şair Ramaldanov isə deyib ki, Paşinyanın sözləri bir çox baxımdan şərh edilə bilər:

“İlk növbədə onun hərbi xərcləri azaltmaq və büdcəyə qənaət etmək barədə düşünməsi mümkündür. Məsələyə məntiqlə yanaşsaq, demək olar ki, İrəvanın siyasəti həqiqətən də bu gün dəyişir. Yəni artıq aqressiv bir Ermənistan yox, qonşularına ərazi iddiasından əl çəkən bir Ermənistan var.

Ölkənin indiyə kimi əsas ərazi iddiası Türkiyə və Azərbaycana idi. Prinsipcə, Ermənistan iki ölkə ilə də qarşı-qarşıya gələcək gücə sahib deyil. Elə isə bu ambisiyaları saxlamağın heç bir mənası yoxdur. Düşünürəm ki, Ermənistanın işğalçılıq siyasətindən qonşuluq prinsipinə keçməsi zərurətdən qaynaqlanır. Paşinyan da bunu praktik addımlarla əsaslandırmağa çalışır.

Fikrimcə, bu ölkənin KTMT-dən çıxması haqda danışmaq tezdir. Maraqlıdır ki, Ukraynada gedən döyüşlərdə təşkilatın heç bir ölkəsi iştirak etmir. KTMT ilə bağlı Ukrayna müharibəsindən sonra daha geniş müzakirələr açılacaq. Hətta təşkilatın daha da genişlənməsi mümkündür”.