İnsan tarixən yer üzərində yaranan gündən musiqi və təbabətin onu daim müşayiət etdiyi məlumdur.
Bu faktı sübut etmək üçün istənilən sayda ədəbi, tarixi mənbələrdən sübutlar göstərmək olar. Doğulan bir gündən ölənə qədər insanların xəstəlik və müxtəlif narahatlıqları yaranır ki, tibbi yardıma ehtiyacı olur.
Bəs insanın musiqiyə ehtiyacı nə zamandan yaranmışdır?
Musiqi də təbabət kimi insan yaranan andan sonadək onu müşayiət edir və hətta musiqi insanın batini aləminə daxil olaraq onunla birlikdə doğulur və istər ağır, istər xoşbəxt günlərdə insanlarla birgə olur. İlkin insanların qayalar üzərində çəkdiyi musiqi alətlərinin və rəqs edən insanların rəsmi vardır.
Mifoloji əfsanələrdə tanrı Apollonun iştirakı ilə keçən musiqi yarışmaları və musiqinin insan həyatındakı rolu haqqında məlumatlar vardır. Antik dövrdə musiqi həm magiya kimi, həm də dünyanın yaranışındakı amillərdən biri olaraq təsəvvür edilirdi. Antik dövrdə Platon və Pifaqor dünyanı səslərdən ibarət bir tamlıq, bütövlük kimi görürdü.
“Söz”, “Səs”, “Vibrasiya” anlayışı kimi dünyanın yaranışına aid müxtəlif görüşlər vardır. Dünya mifologiyasında və dini dünyagörüşündə ən çox diqqəti cəlb edən dünyanın yaranışı haqqında olan bilgilərdir. Bütün mifik söyləncələrdə dünyanın qaranlıq, onun universal bir ruh altında hərəkətsiz və sonsuz olması vurğulanır. Yunanlar bu vəziyyəti Xaos aləmi adlandırır.
Yevangeliyanın Müqəddəs İoann tərəfindən təqdim olunan ilk şeiri belədir:
“Başlanğıcda Söz var idi və Söz (Tanrının) Allahın yanında idi, “Söz” Allah idi”.
Musica mundana – Kainatın musiqisi, musica humana – insanın musiqisi və musica instrumentalis – instrumental və vokal musiqi.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından