İtburnu dəmləməsi böyrək daşlarının xaric olmasında və əriməsində çox xeyirlidir. 15 qr xırda doğranmış itburnu kökü üzərinə 200 ml su əlavə edib, su hamamında 15 dəq. qaynatmaq və 1 saat dəmdə saxlamaq lazımdır. Sonra süzüb gündə 3 dəfə 1 stəkan olmaqla içmək lazımdır.
Bronxların və ağciyərlərin xroniki iltihabi xəstəliklərində qızılgül suyu və qızılgül yağı inqalyasiya üsulu ilə effektiv təsir edir.
Qızılgül sirkəsi ilə tonzillit və angina zamanı boğazı qar-qara etmək lazımdır. Bunun üçün 100 qr qızılgül ləçəyini 100 qr sirkədə 8 gün dəmləmək və bu hazır məhluldan 1ç/q götürüb üzərinə 1 stəkan su əlavə etmək lazımdır. Bəzi müəlliflər isə deyir ki, qızılgül ləçəyini əzib ziyillərin üzərinə qoyduqda, ziyillər yox olur. Dəmlənmiş qızılgül ləçəyini götürüb sıxmadan, dərman ilə yanaşı olaraq ödemlərin, iltihablanmanın, qızıl yel olan nahiyənin üzərinə qoysaq onların sağalmasını sürətləndirər.
Qızılgül dəmləməsi, təzə qızılgül ətri baş ağrısını sakitləşdirir, əgər qızılgül yağını iyləsək asqırma yaranar. Kiçik qurtumlarla qızılgül suyu içmək bayılmanın, gövdəsinin təzə sıxılmış şirəsi isə qan hayxırmanın qarşısını alır.
Qızılgül balı isə iltihab əleyhinə, ümummöhkəmləndirici, tonuslandırıcı xüsusiyyətlərə malikdir. Qızılgül balının hazırlanması: 80qr qızılgül ləçəyinin üzərinə 100 ml qaynar su əlavə edib zəif odda 15 dəqiqə dəmləmək lazımdır. Sonra bir sutka saxlayıb üzərinə 100 qr bal əlavə edilir, yaxşıca qarışdırdıqdan sonra yenidən eynicinsli kütlə alınana qədər qaynadılır. Gündə 3 dəfə 1 ç/q qəbul edilir.
Daha bir hazırlanma qaydası: 1 litr su, 125 qr qızılgül və ya itburnu ləçəyi + 750 qr bal lazımdır. Ləçəklərin üzərinə 1 litr qaynar suyu əlavə edib 15 dəq. qaynatmaq və kənarda 1 gün saxladıqdan sonra balı əlavə edib eynicinsli kütlə alınana qədər qaynatmaq lazımdır. Yuxarı tənəffüs yollarının, ağ-ciyərlərin xəstəliklərində, qızdırma və bir sıra uzun sürən xəstəliklərdə gündə 3 dəfə 1 ç/q qəbul edilir.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından