Son on ildə Azərbaycanda doğum zamanı ana ölümü halları iki dəfə artıb. Rəsmi məlumatlara görə, 2018-ci ildə hər 100 min doğuşa 12,2 ana ölümü düşürdüsə, 2022-ci ildə bu göstərici 14,7-yə yüksəlib.

Ana ölümlərinin səbəbi nədir? Göstəricilər niyə yüksələn xətt üzrə davam edir?

Globalinfo.az-a danışan mama-ginekoloq Təranə Həsənova deyib ki, ana ölümü həm təbii doğuş, həm də qeysəriyyə əməliyyatı zamanı ola bilər:

“Doğuş üsulu ölüm riskinə ciddi təsir göstərmir. Əsas səbəblərdən biri qanaxmadır. Bu, həm doğuşdan əvvəl, həm doğuş zamanı, həm də sonra yarana bilər və ağır fəsadlara gətirib çıxarır. Doğuş zamanı qanaxmanın əsas səbəblərindən biri ciftin vaxtından əvvəl qopmasıdır. Bu, hamiləlik dövründə baş verə bilər və təcili tibbi müdaxilə tələb edir. Proses gecikərsə, ananın həyatını itirmə ehtimalı var. Digər ciddi risk doğuşdan sonrakı qanaxmadır. Bəzən uşaqlıq doğuşdan sonra yığılmır və bu hal (atoniya) bütün tibbi müdaxilələrə baxmayaraq ağır nəticələrə gətirib çıxarır. Ana ölümlərinin digər səbəbi preeklampsiya və onun ağır formalarıdır. Vaxtında müalicə edilmədikdə, bu vəziyyət də həyat üçün təhlükə yaradır. Bəzi hallarda doğuşdan sonra mövcud digər orqan xəstəliklərinin, yəni ekstragenital patologiyaların kəskinləşərək ölümlə nəticələnməsi mümkündür”.

Ginekoloq Astara rayonunda toyundan sonra vəfat edən 17 yaşlı hamilə yeniyetmənin ölümünə də diqqət çəkib:

“Tibbi Ərazi Bölmələrini İdarəetmə Birliyinin (TƏBİB) bununla bağlı yaydığı məlumata diqqətlə baxsaq, görərik ki, o, hamiləlik dövründə lazımi tibbi nəzarətdə olmayıb. Vaxtında həkim müayinəsində olsaydı və hamiləlik prosesi izlənilsəydi, ehtimal ki, bu hal yaşanmazdı. Valideynlərin qızlarını vaxtından əvvəl evləndirməsi, erkən hamiləliyə məcbur edilməsi, tibbi nəzarətin olmaması bu faciəyə səbəb olub və nəticədə faktiki olaraq ana həyatını itirib”.